Trupat e 7 prej 38 viktimave nga përplasja tragjike e dy trenave në Greqi janë djegur plotësisht dhe për identifikimin e tyre duhet bërë testimi i ADN-së. Aktualisht ata ndodhen në morgun e përgjithshëm të Larisës, zonës ku ndodhi aksidenti.
Shefja e Shërbimit Mjekësor të Larisës, Rubin Leontari tha: “7 trupa janë karbonizuar. Procesi i identifikimi nuk ka filluar ende. Ky është një proces i mundimshëm që kërkon kohë. Disa trupa kanë nevojë për testin e ADN-së ne mënyrë që të bëhet identifikimi i tyre”.
Pjesa më e madhe e trupave të karbonizuar janë të rinj, por mes tyre nuk është gjetur asnjë fëmijë.
Si pasojë e përplasjes së dy trenave, 38 persona kanë humbur jetën dhe 85 kanë mbetur të plagosur. Autoritete greke besojnë se numri i viktimave ka gjasa të rritet.
Kryeministri i Greqisë, Kyriakos Mitsotakis, ka shpallur tre ditë zie kombëtare pas aksidentit tragjik të ndodhur pak para mesnate në Tempe. Vendimi hyn në fuqi nga sot, 1 mars deri më 3 mars 2023 me flamuj në gjysmështizë në të gjitha ndërtesat publike dhe pezullimin e festave publike.
