Kryetari i PD-së, Sali Berisha deklaroi këtë të Martë se kryeministri Edi Rama ka qëllim të shembë 96 mijë banesa në Tiranë.
Referuar një raportimi mediatik, një projekt-vendim qeverie, i hartuar nga strukturat e Ministrisë së Infrastrukturës dhe Energjisë, planifikon që të gjithë objektet që kanë mbi 50 vjet që janë ndërtuar do të duhet t’i nënshtrohen auditimit teknik, që do të konsistojë në kryerjen e ekspertizës së thelluar. Në rast se vlerësohet se objekti nuk përmbush kushtet teknike, i hapet rruga riparimit ose prishjes”, parashikon projekt-vendimi.
Lidhur me çështjen foli këtë të Martë kryedemokrati Sali Berisha i cili tha se synimi i kësaj nisme nga Rama është “të prishë 96 mijë banesa në qytetin e Tiranës”
“Ka qëllim të vendosë qytetin, troje e banesa në dispozicion të klaneve të drogës, oligarkëve të tij”, shtoi ai.
“Pasi shfrytëzoi fatkeqësinë natyrore të tërmetit tërësisht për pasurimin e tij dhe klikës së tij. Ju jeni dëshmitar se si është shfrytëzuar në Kombinat kjo fatkeqësi, tani nuk i durohet më, nuk pret më. Tani autorizoi veten, i dha vetes ‘karta bianka’ për të prishur çdo banesë që ai e konsideron fitimprurëse, ndërtimin në atë troje fitimprurës për veten dhe suitën e tij”, tha më tej.
Berisha foli dhe për ish-agjentin e FBI-së, Charles Mcgonigal për të cilin tha se e ka e ka vendin në burg.
“McGonigal e ka vendin në burg, atje ku është, Edi Rama pas tij. Edi Rama duhet të shkojnë pas tij”, theksoi Berisha.
“Jo vetëm paguan paratë dhe i angazhon kundër opozitës, por vazhdon bashkëpunimin me të në një kohë kur ai priste gjoba në Tiranë, gjobiste biznesmenë, përdorte pushtetin e SHBA-së, agjencisë së tij për të terrorizuar, marrë peng qytetarët shqiptarë”, u shpreh.
Kreun e qeverisë e quajti despot. Berisha tha se baxhanaku dhe thjeshtra e tij kanë fituar dhjetëra tendera publikë, në kundërshtim me ligjin.
“Despotët nuk kanë as ligje, as rregulla, kanë vetëm vullnetin e tyre. Ky është Edi Rama. Shndërron Shqipërinë në një çiflig të familjes së tij dhe kjo e ka tërbuar këto ditë. Nuk kam dëshirë ti përmend as njeriu familjen, por absolutisht kur të jetë puna për interesat tuaja do të ja përmend gjithkujt që e përdor kundra jush. Po pse do të fitojë dhjetëra e dhjetëra tendera baxhanaku i tij, në një kohë me ligj ai nuk duhet të marrë pjesë në tendera në një kohë sa e ka baxhanakun kryeministër. A më keni dëgjuar ndonjëherë të them një fjalë për të në një kohë kur ai nuk ishte qeveritar, Edi Rama, por tani ai është kryeministër. Baxhanaku nuk mund të marrë pjesë në tendera. Baxhanaku është fitimtar më i sigurt në Shqipëri i tenderave. Por Çuçi nga doli. Pse u vu Çuçi, Çuçin e vuri droga, është histori droge. Ka një thjeshtë vajzë të mrekullueshme, por problemi është se kompania e saj fiton gjithë tenderat. A shkon kjo? Po, po një grup arkitektësh fatlum se punon ajo aty, dhe pothuajse çdo tender të Ministrisë së Kulturës dhe Bashkisë së Tiranës e fiton ajo. Por Shqipëria nuk ka qenë kurrë kaq e hapur kjo vjedhje, pa mëshirë, gjithçka në funksion të tij”, tha ai.
Gjatë takimit me strukturat e degëve 6, 13 dhe 16 të Tiranës, Berisha u kërkoi të angazhohen për fitoren e Belind Këlliçit në zgjedhjet e ardhshme lokale.
Ai foli dhe për çështjen e vulës së PD, duke akuzuar Ramën se po bën ndërhyrjet e fundit armiqësore ndaj PD-së në gjykatë.
“Po bën ndërhyrjet e fundit armiqësore ndaj PD-së në gjykatë. Por unë i them, se absolutisht ndaj çdo vendimi tënd, faturën do e paguash vetëm ti si kryeministër, si krim-ministër, qeveria jote. Ne nuk shuhemi, ne jemi forcë politike e pamposhtur, ne e faktuam këtë”, tha Berisha.
Qytetarëve u bëri apel tu bashkohen protestës së 3 Marsit.
Gjatë fjalës së tij, Berisha e cilësoi vendim anti-kushtetues, atë të Gjykatës Kushtetuese, për mos heqjen e mandatit të deputetes, Olta Xhaçkës.
