Politikanët në Shqipëri përdorin çdo mjet dhe metodë për të afruar votuesit në prag të zgjedhjeve, por “një koncert” me rapsodë nuk e kishte premtuar askush si Safet Gjici më parë.
Kryetari socialist i bashkisë së Kukësit duket se ka nisur vrullshëm fushatën për zgjedhjet e 14 majit, duke mos u privuar aspak nga “arratia” e kuksianëve (kryesisht rinisë) që mori gomonet për në Angli gjatë verës, për të përmbushur misionin e tij që është sa më shumë vota përballë demokratëve.
Me Kukësin si një bastion të djathtë dhe me PD e drejtuar nga Berisha duket shumë e vështirë që Gjici të votëbesohet në krye të bashkisë, por kryebashkiaku duket se ka nisur “t’i kërkojë” deri në Londër ata që u larguan nga qyteti që ai administron për shkak të keqqeverisjes, mungesës së vendeve të punës apo taksave të larta.
Këtë e ka njoftuar vetë Gjici me një postim në Facebook, ku u kërkon kuksianëve që t’i bashkohen një takimi të tij elektoral më 4 mars në Londër.
Gjici bëri me dije se takimi do të mbahet në kuadër të vijimit të turit me emigrantët kuksianë në Londër, ku sipas tij do të diskutohet mbi projektet zhvillimore që janë bërë deri tani dhe ndarjen e vizionit për punët e ardhshëm që e presin Kukësin.
Thirrja e Gjicit për t’iu treguar vizionin e tij për zhvillim bashkëqytetarëve që rrezikuan jetën në kamionë dhe gomone për t’u larguar nga qarku me varfërinë më të madhe në vend dhe normën më të lartë të emigrimit duket një paradoks, por kryebashkiaku për t’i joshur duket se do të marrë me vete dhe dy rapsodë popullorë.
Postimi i Gjicit:
Vijojmë me turet bashkëbiseduese këtë herë me emigrantët kuksianë që janë në Londër, me fokus diskutimi projektet zhvillimore që janë bërë deri tani dhe ndarjen e vizionit për punët e ardhshëm që e presin Kukësin.
Më datë 4 mars, ditë e shtunë, ora 18:00 (me orën e Anglisë), ju ftojmë në Holiday Inn AN IHG’HOTEL London Camden Lock. Pjesë e takimit do jenë edhe rapsodët Rexhep Kovaçi e Hysen Dida.
Në adresën (location):
30 Jamestown Road
Camden ToWn
Nw17BY
England
