Kreu i PD-së Sali Berisha, në një deklaratë për mediat, tha se dy zyrtarë të lartë socialistë që ishin përgjegjës për veprimtarinë e ish agjentit të FBI-së, McGonigal në Tiranë ishin Damian Gjiknuri dhe Taulant Balla.
Berisha tha se SPAK nuk do ta hetojë këtë çështje, pasi aty del i përfshirë vetë kryeministri Rama.
“Ministrat ishin në dispozicion të plotë me urdhër të Ramës, të këtij kryemafiozi që tradhëtoi vendin e tij, që u korruptua nga Edi Rama dhe që të dy për qëllime dhe interesa personale zhvilluan veprimtari anti-amerikane dhe anti-ligjore. Në këtë kontekst, njerëzit përgjegjës nga qeveria shqiptare për të organizuar veprimtaritë zyrtare të McGonigal në Shqipëri kanë qenë dy: Damian Gjiknuri dhe Taulant Balla. Këta kanë marrë pjesë në vendosjen e gjobave nga ekipi i McGonigal.
SKAP i Partisë nuk heton dhe nuk do t’a hetojë këtë çështje sepse në çdo skaj, në çdo qoshe dhe kudo që ta prekësh, fijet të çojnë te Edi Rama. Gjiknuri i vetëdijshëm për veprimtarinë ligjore që ka zhvilluar, u deklaroi mediave se “çdo gjë e kam bërë me porosi të Edi Ramës”, tha Berisha.
Berisha foli gjithashtu për një listë me 152 persona të shpallur non grata që ishte hartuar nga ish kreu i PD-së, Lulzim Basha, kryeministri Rama, Gabriel Eskobar dhe Yuri Kim.
“Ndërkohë theksoj se në krijimin e begraundit të favorshëm për gjobëvënie për McGonigal dhe ekipin e tij, një grup më i gjerë individësh i ka shërbyer këtij aktiviteti të pashembullt korruptiv.
Bëhet e qartë se në funksion të këtij aktiviteti ishte thashethemi zyrtar, sipas të cilit lista u dorëzua nga Basha, Gabriel Escobar, apo Rama dhe natyrisht, Yuri Kim.
A ishte kjo një përpjekje për të krijuar një mjedis sa më receptiv ndaj gjobave të McGonigal dhe ekipit të tij, unë për këtë ftoj të hetojë Inspektorin e Përgjithshëm të DASH, FBI-në dhe Komisionin e Kongresit të SHBA.
Por ky gossip zyrtar, përbënte pa diskutim krijimin e terrenit më të favorshëm për gjobëvënies mafiozë, që thuhet se kanë mbledhur shuma dhjetëra e dhjetëra milionë,” tha Berisha.
