Aksidenti i frikshëm me nëntë të plagosur dhe dhjetë automjete të shkatërruara, ku u përfshi një nga autobusat e linjës së Unazës në pronësi të biznesmenit kontrovers Nadir Çausholli, sipas Shefit të Qarkullimit në Policinë e Tiranës, Taulant Gjoka mund të ketë për përgjegjës kryesor shoferin e urbanit.
Teksa më herët nga vendngjarja deklaroi se nuk përjashtohej shpejtësia e autobusit ose mjeteve te tjera në vendngjarje si pistë hetimi, Gjoka pasi policia kreu testet e alkolit për shoferët e përfshirë në aksident, tha për Neës 24 se dyshohet si fajtor 63-vjeçcari që drejtonte autobusin, Agron Xhafa.
“Referuar të dhënave që kemi marrë nga grupi ghetomor, mund të themi që kemi të dyshuar drejtuesin e autobusit për shkelje të kodit rrugor. 5 shoferët e përfshirë në aksident u janë bërë testet e alkoolit, dhe kanë rezultuar negativë.
Shoferi ka deklaruar se ka qenë jo koshient në momentin e ngjarjes për shkak se ka thënë se vuan nga një sëmundje, e për këtë i është bërë testi i drogës, por nuk kujton çfarë ka ndodhur”, u shpreh ai.
Ndër të tjera Gjoka nënvizoi se po hetohet për zbardhjen e plotë të shkaqeve të aksidentit të ndodhur paraditen e sotme që mund të kishte përfunduar në një tragjedi të vërtetë në një nga zonat me prezencë të lartë të qytetarëve në kryeqytet.
“Policia po heton për të parë dhe kënde të tjera të aksidentit, jo vetëm atë që shfaqet në këtë video. Nuk duhet të nxitojmë për të bërë me faj asnjë nga dejtuesit që janë përfshirë në këtë aksident të pazakontë, për sa i përket numrit të mjeteve”, nënvizoi Gjoka.
