Një person i dyshuar nga policia si shpërndarës droge është arrestuar në Fier, ndërsa një tjetër është shpallur në kërkim.
Gjatë operacionit, janë sekuestruar heroinë si dhe mbi 14 000 euro.
Aksioni
Aksioni i koduar “Weekend” i kryer nga seksioni për Hetimin e Narkotikëve të DVP Fier, në bashkëpunim me Komisariatin e Policisë, erdhi “bazuar në inteligjencën informative se 2 shtetas shpërndanin doza drogash të forta, në qytet”, informuan këtë të Shtunë burime zyrtare nga policia lokale.
Si rezultat i këtij operacioni, u arrestua në Arben Muka, 43 vjeç, si edhe u shpall në kërkim shtetasi Elvir Kananaj, 33 vjeç, të dy banues në Fier.
Gjatë kontrollit fizik të Mukës, efektivët gjetën 81 doza me lëndë të dyshuar narkotike heroinë, ndërsa në banesën e shtetasit Kananajt gjetën dhe sekuestruan 13 750 euro dhe 400 dollarë, të dyshuara të përfituara nga shitja e heroinës.
“Po punohet për dokumentimin e plotë të veprimtarisë kriminale të këtyre shtetasve”, ndërsa “materialet procedurale i kaluan Prokurorisë pranë Gjykatës së Rrethit Gjyqësor Fier, për veprime të mëtejshme”, mbyllet njoftimi i bluve.
