Ish-ministri i Brendshëm Saimir Tahiri do të vijojë të mbetet pas hekurave, teksa kërkesa e tij për njohjen nga gjykata të ditëve të qëndrimit në paraburgim do të presë deri në 10 mars për t’u shqyrtuar.
Seanca e kësaj të premte për Tahirin në Gjykatën e Elbasanit është shtyrë, pas kërkesës së avokatit mbrojtës së tij Maks Haxhia.
Në argumentin e dhënë në gjykatë Maks Haxhia sqaron se shtyrja është kërkuar për shkak të mungesës për arsye shëndetësore.
Tahiri ka kërkuar nga Gjykata e Elbasanit uljen e dënimit me 1.6 vite burg, duke nënvizuar që do t’i njihet periudha e paraburgimit.
Njoftimi:
Përshëndetje.
Në vijim të kërkesës tuaj, ju bëjmë me dije se seanca gjyqësore me kërkues z. Saimir Tahiri me objekt “Llogaritje e vuajtjes së dënimit, është çelur sot më datë 24.02.2023 në orën 09:24, në prezencë të prokurorit të çështjes dhe në mungesë të avokatit përfaqësues të kërkuesit z. Saimir Tahiri, i cili ka paraqitur kërkesë për shtyerje seance për arsye shëndetësore dhe në mungesë të kërkuesit z. Saimir Tahiri edhe pse gjykata i është drejtuar me kërkesë për shoqërim Instituconit të Ekzekutimeve Penale.
Seanca gjyqësore është çelur sikurse ishte paracaktuar nga gjykata dhe sikurse ishin njoftuar palët në proces, sot më datë 24.02.2023, por nuk është zhvilluar shqyrtimi gjyqësor për shkak të kërkesës për shtyrje të paraqitur nga avokati i kërkuesit z. Saimir Tahiri.
Seanca e radhës është planifikuar për shqyrtim nga gjykata në datë 10.03.2023 ora 09:15.
