Protestuesit e fushatës “Led By Donkeys” derdhën karroca me bojë nlu dhe të verdhë në rrugën para ambasadës së Rusisë në Londër, që ndodhet në zonën e Kensington.
Grupi mori përgjegjësinë për flamurin verdhe-blu prej 500 metrash katrorë që mbuloi rrugën Bayswater të enjten në mëngjes, ndërsa katër anëtarë të tyre janë arrestuar pasi pikturuan flamurin gjigand.
“Kjo është për të shënuar përvjetorin e luftës në Ukrainë”, u shprehën përfaqësues të grupit në fjalë.
#SlavaUkraini 🇺🇦https://t.co/rub99LhWfC
— DCminx 🕊️🌍🔥🌱🌻 (@dcminx) February 23, 2023
Protestuesit synonin t’i dërgonin një mesazh të drejtpërdrejtë udhëheqësit rus Vladimir Putin me marifetin që përdorën.
“Nesër është përvjetori i parë i pushtimit imperialist të Putinit në Ukrainë. Ndryshe nga sa pretendojnë diktatori rus dhe mbështetësit e tij, Ukraina është një shtet i pavarur dhe një popull me çdo të drejtë për vetëvendosje. Ekzistenca e një flamuri masiv ukrainas jashtë ambasadës së tij në Londër do të shërbejë për t’i kujtuar atij këtë”, nënvizohej në një deklaratë të tyre.
Tre meshkuj dhe një femër përfunduan pas hekurave me dyshimin për dëmtim kriminal dhe pengim të të lëvizjes në rrugë, dhe mbeten në paraburgim sipas Policisë Metropolitane.
Trafiku u pengua përkohësisht pasi aktivistët shtynë karrocat e ngarkuara me bojë dhe më pas i derdhën në rrugë.
Një nga protestuesit mbante një tabelë ku thuhej: “Protesta e Solidaritetit të Ukrainës – Vozisni ngadalë – Bojë që lahet“.
Aktivistët gjithashtu shtuan se boja e përdorur për krijimin e flamurit ishte “bojë e standardit të lartë, jo toksike, pa tretës, eko-miqësore dhe që thahet shpejt, pra posaçërisht e krijuar për të bërë art rrugor“.
