Byroja e Kuvendit nuk ka ndryshuar vendimin për përjashtimin e deputetëve demokratë. Deputetët demokratë akuzohen se bllokuan foltoren, i ranë bilbilit dhe vunë zhurmues në seancë.
Gjashtë deputetët e përjashtuar me vendim të sekretariatit për procedurat, votimet dhe Etikën i janë drejtuar me një letër Byrosë së Kuvendit, teksa e quajnë vendimin antikushtetuese dhe një akt të rëndë ndaj parlamentarizmit në Shqipëri.
Në letrën e tyre të ankimimit thuhet se Vendimi i përjashtimit ndaj 6 deputetëve u mor më 21 shkurt, por hyn në fuqi të nesërmen, ndërkohë që seanca është zhvilluar në datë 16 shkurt. Sipas tyre, kjo bëhet me qëllimin e vetëm që të pengohen deputetet nga pjesëmarrja në më shumë se një seancë parlamentare si dhe në komisioni.
Po kështu, deputetët Sorina Koti, Elda Hoti, Greta Bardeli, Lindita Metaliaj, Edmond Spaho, Oerd Bylykbashi deklarojnë se vendimi nr.39 i 21 shkurtit shkel nenin 70/1, 79/1, 73/1 të Kushtetutës.
Gjithashtu ky vendim, theksojnë ata është marrë në shkelje të neni 65/2 pika 2 të Rregullores së Kuvendit, në mungesë totale transparence, pa prezencën e deputetëve akuzues që kishin nënshkruar kërkesën për përjashtim, si dhe në mungesë të provave, fakteve apo indicieve.
Seancën e sotme nuk do të jenë prezentë 8 deputetë, mes tyre Kryetari i PD Sali Berisha dhe Sekretari i Përgjithshëm i PD Flamur Noka.
