Nga Boldnews.al
Shembja e rrugës së Borshit në janar të vitit 2021 ngriti një nga problematikat më të mëdha të bërjes dhe mirëmbajtjes së rrugëve nacionale në vendin tonë. Firma “Salillari” mirëmbante atë aks, por që rikonstruksioni u bë me para shtesë.
Megjithë inspektimet apo hetimet penale të institucioneve, asnjë person apo firmë u vu para përgjegjësisë. Për rrjedhojë, ARRSH akordoi 1.3 milionë për riparimin, duke rënduar arkën e buxhetit të shtetit. Ndërkohë, kohë më pas, e njëjta firmë fitoi tenderin e mirëmbajtjes të së njëjtit aks. Ndërkohë, paralelisht me këtë rrugë, Autoriteti Rrugor Shqiptar hapi tendera edhe për mirëmbajtjen e rrugëve të tjera kryesore në vendin tonë. Ndër to ka qenë edhe rruga e fshatit Sevaster në Vlorë, në kufi me Tepelenë. Për mirëmbajtjen janë akorduar miliona euro, por rruga ka filluar që të rrëshqasë. Por gjejeni se kush do t’i paguajë paratë e rregullimit të rrëshqitjes? ARRSH-ja apo firma që mirëmban këtë aks?
BoldNews.al ka siguruar dokumentet e një procedure tenderuese për rrëshqitjes e këtij aksi. ARRSH-ja ka hapur tenderi me objekt “emergjence, shembja në aksin Qafë Dushk – Sevaster, km 8.5”. Autoriteti kontraktues është institucioni i drejtuar Evis Berberi, një nga “berberët” e fondeve të buxhetit të shtetit, njeri i afërt me Belinda Ballukun. Fondi për këtë procedurë është 22.392.647 lekë me TVSH ose rresh 220 mijë euro me TVSH. Mësohet se dokumentet janë dërguar me urgjencë në Agjencinë e Prokurimit Publik, teksa në dokumente specifikohet se janë “punime ndërtimi për rrugë të rrëshqitshme”. Por nëse janë të rrëshqitshme, a nuk duhet të mirëmbahen nga firma që mirëmban këtë aks? Në specifikimet teknike thuhet mjaft qartë se firma duhet që të rregullojë rrëshqitjet, ndërsa e mirëmban edhe në pjesët e tjera përbërëse. Por, sa para’ fiton kjo firmë?!
Redaksia jonë vijoi hulumtimin, teksa u ndalëm te tenderi i mirëmbajtjes së këtij aksi. Sipas dokumentit të mësipërm, disa kohë më parë ARRSH-ja ka hapur një tender me objekt “mirëmbajtje me performancë të rrugëve rajoni jugor” i ndarë në 13 lote. Fondi për të gjitha lotet ka qenë rreth 20 milionë euro, financuar nga buxheti i shtetit. Një nga lotet ka qenë “mirëmbajtje rutinë me performancë rruga Tepeleneë – Dukaj + rruga k/Salari – Sevaster + rruga Sevaster – Qafë Dushk + rruga Sevaster – Kalivacc + rruga Peshkepi – Gjorm + rruga Bypass Tepeleneë 84 km”. Pra, një nga akset që duhet të mirëmbahej ka qenë edhe rruga Sevaster – Qafë Dushk. Pikërisht, vendi që kishte rrëshqitur! Fondi për këtë lot ka qenë 155.028.811 lekë pa TVSH, ose rreth 1.5 milionë euro. Ndërkohë, shpallja e fituesit është bërë në fund të vitit 2020 dhe ka një afat kohor prej 48 muaj nga neënshkrimi i marrëveshjes kuadër. Pra, një kontratë që është ende në fuqi! Por kjo s’e ka penguar Berberin që të ritenderojë një procedurë tjetër, me para sërish nga buxheti për të mbuluar problemet e mirëmbajtjes.
