Në Britaninë e Madhe ka nisur sot një hetim për vdekjen e stjuardesës shqiptare Greta Dyrmishi, pak pasi avioni i kompanisë “Air Albania” u ul në aeroportin Stansted të Londrës më 21 dhjetor të vitit të kaluar.
24-vjeçarja ishte pjesë e ekuipazhit të “Air Albania” dhe ndërroi jetë në rrethana të çuditshme, që u sqaruan nga kompania ajrore vetëm 1 javë pas ngjarjes, duke bërë me dije se kishim të bënim me një arrest kardiak.
“Më 21 Dhjetor, pasi zbritëm të gjithë udhëtarët e fluturimit drejt Londrës, një nga anëtarët e ekipit të kabinës, Greta Dyrmishi pësoi atak kardiak. Edhe pas të gjithë asistencës mjekësore të ofruar në moment, ne përsëri e humbëm”, thuhej në njoftimin e “Air Albania”.
Ndërkohë, një gjykatë në Essex (zona ku edhe ndodhet aeroporti Stansed) dëgjoi sot ekspertët mjekësorë që trajtuan 24-vjeçaren në vendngjarje, duke thënë se Dyrmishi po udhëtonte nga kryeqyteti shqiptar, Tirana, për në Essex më 21 dhjetor, kur i ra të fikët papritur.
Ndihma e parë dhe CPR iu dha në vendngjarje, por ajo fatkeqësisht ndërroi jetë. Njësia e Shërbimit të Ambulancës Lindore të Anglisë tha se dy ambulanca, një automjet i ekipit të reagimit të zonës së rrezikshme dhe ambulanca ajrore e “Essex & Herts” iu përgjigjën raporteve për një grua të sëmurë rëndë në bordin e një avioni.
Mjekja ligjore e zonës së Essex, Michelle Brown tha në gjykatë se vdekja e Gretës do t’i nënshtrohej një hetimi të plotë dhe të dokumentuar.
“Kjo femër 24-vjeçare ishte në ekuipazhin e kabinës në një fluturim nga Shqipëria dhe ndodhej në pistë kur i ra të fikët dhe iu dha ndihma e parë bazë. Dhjetë minuta më vonë ajo nuk kishte puls dhe ndaj saj u krye CPR. Mjekët e trajtuan atë dhe konfirmuan se ajo kishte vdekur. Autposia pas vdekjes zbuloi se shkaku i saj i vdekjes ishte sindroma e vdekjes së papritur të të rriturve”, u shpreh mjekja Brown.
Ajo shtoi: “Në kohën e incidentit, stjuardesa ishte në pjesën e përparme pranë dyerve të një avioni në aeroportin Stansted. Ky rast është i përshtatshëm për një hetim të dokumentuar në kohën e duhur“.
