Deputetët e Partisë Demokratike, Dashnor Sula dhe Bledjon Nallbati kanë dorëzuar këtë të Hënë në Gjykatën Kushtetuese kërkesën për shfuqizimin e Bordit për Përcaktimin e Çmimeve të Produkteve Ushqimore.
Në një deklaratë për mediat, deputeti Dashnor Sula thotë se Bordi i Çmimeve nuk përfaqëson interesat e qytetarëve, ndërsa thotë se çmimet e ushqimeve në vendin tonë janë dyfishuar. Sula thotë se paketa e rezistencës ushqimore është e pamjaftueshme.
“Sapo dorëzuam kërkesën për shfuqizimin e aktit normativ të qeverisë për bordin për çmimet e ushqimeve. Qeveria i ka kthyer në ditë dimri të gjitha ditët e verës për qytetarët shqiptarë. Kanë paguar çmime të larta për të gjitha produktet ushqimore. Paketat e ndihmës së qeverisë ishin tërësisht të pamjaftueshme. Unë bashkë me kolegët e PD kemi bërë përllogaritje dhe del që është 76.7% rritja e produkteve të shportës. Gati dyfishim. Paketa që jep kjo qeveri janë vetëm thërrime. Kjo është për të ardhur keq dhe gjej momentin t’i bëj thirrje Gjykatës Kushtetuese që të marrë me procedurë të përshpejtuar këtë kërkesë. Ky bord është abuziv dhe nuk përfaqëson interesat e qytetarëve të shqiptarëve. Është një bord që përbëhet nga qeveria dhe grosistët, zero përfaqësim të qytetarëve shqiptarë. Është thjeshtë propagandë. I kërkojmë ndjesë qytetarëve për vonesën”, tha ai.
Pak ditë më parë në Kushtetuese deputetët e grupit parlamentar të PD-së dorëzuan kërkesë për shfuqizimin e Bordit të Transparencës për Karburantet si dhe dy ligjeve të miratuara për këtë çështje.
