Në Gjykatën e Posaçme është zhvilluar këtë të martë seanca gjyqësore për të akuzuarit Euglent Halli dhe Xhuliano Hoxha, të cilët janë bashkëpunëtorë në vrasjen e Regis Runajt dhe Emiljano Ramazanit, në një diferencë prej 10 ditësh nga njëri-tjetri, në Elbasan.
Nën masa të rrepta sigurie është shfaqur në sallën e gjyqit edhe i penduari i drejtësisë Nuredin Dumani, i cili ka konfirmuar në GJKKO dëshminë që ka dhënë për vrasjen e Ramazanit.
Ai ka rrëfyer në detaje vrasjen e Ramazanit, duke përmendur si porositës të ekzkekutimit Erjon Alibejn, ndërsa vrasësi sipas Dumanit është Skerdi Tase.
Dumani ka pranuar se ka qenë organizatori i dy vrasjeve, ndërsa pavarësisht se është shfaqur si dëshmitar, GJKKO i ka caktuar edhe atij avokat.
Dumani zbuloi se ndihmës për ekzekutimin e Ramazanit më 20 korrik 2020 kanë qenë Henrik Hoxhaj, Xhuljano Hoxha dhe Euglen Halili.
Vrasja është kryer poshtë shtëpisë së tij, teksa Ramazani po parkonte automjetin tip “Ford Fokus”. Autorët kanë qenë tre vetë në makinë dhe njëri prej tyre ka qëlluar 5 herë me armë tip pistoletë, ndërsa në makinë u gjetën dy kallashnikovë të djegur.
Vrasja e Emiljano Ramazanit, i njohur me nofkën ‘Rramani’, dyshohet se ka ndodhur për larje hesapesh për drogën, pasi ai njihej si shpërndarës kokainë në qytet, ndërsa pak ditë pas vrasjes së tij u gjet i vrarë edhe miku i tij i ngushtë Regis Runaj.
23-vjeçari u vra me thikë dhe më pas trupi i tij është hedhur buzë rrugës afër varrezave të qytetit, një rrugë qorre ku nuk kalojnë njerëz. Kjo i ka ndihmuar autorët që të mos lënë gjurmë pasi kanë vrarë Runajn.
