Dy të arrestuarit për atentatin e mbetur në tentativë në Elbasan, Arben Spahiu dhe Arsen Preçi janë marrë në pyetje nga hetuesit e policisë, në lidhje me mjetin tip “BMW X6” që së bashku me tre armë zjarri kallashnikov u gjet në zonën e “ish-Konservimit”, rreth 50 metër larg banesës së Erion Alibejt.
Ata gjithashtu janë pyetur për dokumentet e falsifikuara me foton e Spahiut, që u gjetën në çantën e supit që ishte hedhur në koshin e mbeturinave pranë vendit ku u gjet makina.
Të dy të arrestuarit kanë mbajtur deklarim mohues përballë këtyre fakteve, ndërsa Spahiu ka pohuar se nuk ka dijeni për mjetin, armët dhe dokumentet false.
“Nuk e di kush e ka bërë këtë. Dokumentet nuk janë të miat”, ka thënë ai për dokumentet e falsifikuara greke me foton e tij, duke pretenduar se dikush mund të ketë dashur t’i bëjë keq.
Por pavarësisht deklarimeve mohuese, grupi hetimor ka bindjen se ata janë poseduesit e armëve të sekuestruara dhe shënjestra e atentatit të mbetur në tentativë ishte Elton Kila, i njohur si “Oti i Elbasanit”.
Dyshohet se atentati ndaj tij mund të jetë porositur nga burgu, me urdhër të Erjon Alibej për shkak të konflikteve të mëparshme dhe pazareve të drogës.
Aktualisht Arben Spahiu dhe Arsen Preçi akuzohen për “Mbajtja pa leje dhe prodhimi i armëve, armëve shpërthyese dhe municionit”, “Falsifikimi i dokumenteve” dhe “Sigurimi i kushteve dhe mjeteve materiale për të kryer vrasje”, por nëse provohet që dy të arrestuarit merrnin urdhra nga Alibej, dosja i kalon SPAK dhe akuza do të jetë për pjesëmarrje në grup të strukturuar kriminal.
