Nga Boldnews.al
Një firmë greke ka fituar sërish tenderin e Komisionit Qendror të Zgjedhjeve për fushatën sensibilizuese. Është e njëjta që fitoi edhe në vitin 2021, duke ngritur hije të mëdha dyshimi se gjithçka ka qenë e paracaktuar. Por nëse Celibashi donte t’ia jepte paratë kësaj firme, përse bëri tender? Çfarë e lidh kreun e KQZ-së me këtë firmë, aq sa firmat e tjera kanë “frikë” të bëjnë ofertë? Kush fshihet pas këtyre procedurave dhe kush është më i fituari?
Duke qenë se jemi në prag të zgjedhjeve lokale, Komisioni Qendror i Zgjedhjeve ka filluar përgatitjet, duke bërë me dhjetëra tendera. Njëri prej tyre është ai i propagandës, ai sensibilizuesi, që mëson shqiptarët si të votojnë apo për mënyrat e tjera. Dhe, për herë të dytë radhazi, shqiptarët do të mësohen si të votojnë nga një firmë greke. Po nëse do të kishte ndodhur një gjë e tillë në Greqi, çfarë do të ndodhte? A do të pranonin shtetasit grek të merrnin leksione nga një firmë shqiptare? Gjithsecili prej nesh e ka një përgjigje në majë të gojës për këto pyetje, por le të vijojmë me procedurat e ndjekura nga KQZ-ja, e cila duket se ia ka bërë dhuratë këtë tender, duke eliminuar kundërshtarët.
Sipas dokumenteve që disponon BoldNews.al, Komisioni Qendror i Zgjedhjeve ka shpallur fituesin e tenderit me objekt “shërbime për fushatën edukuese, informuese dhe sensibilizuese”. Në këtë procedurë ka marrë pjesë firma “OGLIVY” me një vlerë 22.042.800 lekë pa TVSH. Ndërkohë, ka qenë fiktivisht edhe firma “ALB DESIGN PSP”, e cila s’ka paraqitur ofertë ekonomikë.
Pra, nga dy firma, njëra nuk paraqiti ofertë, duke ngritur hije të mëdha dyshimi se gjithçka ka qenë e paracaktuar. Po nëse s’kishte garë, përse u mundua më kot Celibashi? Përse nuk negocioi, pasi në këtë mënyrë mund të ulte edhe vlerën e ofruar nga firmat? Megjithatë, duke parë edhe tenderët e mëparshëm, kreu i KQZ-së nuk ia ka lënë në dorë fatit, por duket se ka ndërhyrë për t’ia dhënë këtë tender firmës greke.
Sipas Qendrës Kombëtare të Biznesit, kompania “OGILVY” e themeluar në vitin 2005, ka si aksioner z.Konstantinos Panagiotopoulos (49 %) dhe kompaninë “BOLD OGILVY & MATHER S.A” (51 %). Nga një vëzhgim i thjeshtë rezulton se të dy aksionarët janë me origjinë grekë.
Por, jo më kot është shpallur kjo firmë fituese! BoldNews.al ka investiguar edhe më herët një procedurë e ngjashme, ku fitues është shpallur e njëjta firmë. Në vitin 2021, redaksia jonë publikoi se kjo firmë fitoi tenderin me objekt “prodhim, montim, afishim për materialet promocionale, informuese dhe edukuese”. Në tenderin e 2021-shit morën pjesë dy kompani, grekët e “OGILVY” me ofertë 18.290.833 lekë të rinj dhe “On Time Concept Albania Communication Service” me ofertë 18.370.000 lekë. Fitues u shpallën grekët e “OGILVY”. Pra e njëjta firmë që fitoi pa garë edhe në 2023-shin. Të jetë rastësi?
