Drejtori i Përgjithshëm i Shërbimeve të Transportit Rrugor, Blendi Gonxhe ka pranuar për herë të parë rritjen e çmimit të patentave në vlerën e 85 mijë lekëve të reja.
Gjatë emisionit “Shqipëria Live” në Top Channel, Gonxhe ka befasuar të gjithë kur tha se dyfishimi i çmimit bëhet për shkak të ndërgjegjësimit të qytetarëve që të kryejnë të plotë kursin e patentës.
Por me argumente të dobëta, Gonxhe thotë “që ne po rrisim çmimin sepse ne këtë mënyrë mund të bëhet kursi i plotë në teori dhe praktikë, duam t’i ndërgjegjësojmë qytetarët”.
Dyfishimi i çmimit të patentës ka bërë që qytetarët e shumtë të dynden pranë qendrave shëndetësore duke krijuar radhë të gjata për të marrë dokumentet përkatëse që bëjnë të mundur nisjen e procedurave për pajisjen me lejen e drejtimit.
Lejet e drejtimit që deri më tani kushtonin rreth 450 mijë lekë të vjetra do të dyfishohen javët e ardhshme. Drejtoria e përgjithshme e Transportit Rrugor ka firmosur marrëveshje me grupet e interesit që përfshin rreth 300 autoshkolla në të gjithë vendin.
Me çmimin e ri që shkon në 850 mijë lekë të vjetra. Vendimi i ri rrit edhe orët e teorisë që shkojnë në 36 seanca, të cilat do të bëhen për 15 ditë. Ndërkohë, seancat praktike që do të zgjasin 40 minuta secila, do të jenë 34 nga 25 që ishin deri më tani.
