Futbolli shqiptar prej vitesh vuan në prodhimin e një sulmuesi pykë. Në vitet e fundit kjo fatmirësisht ka ndryshuar.
Emra si Skuka e Muçi kanë bërë kalime të bujshme në kampionate të huaja ndërsa së fundmi kanë dalë në skenë lojtarë si Dijar Nikqi, Flamur Ruçi, Luis Kaçorri dhe Klejdi Daci.
Ky i fundit është i vetmi që pavarësisht moshës, ka një eksperiencë më të gjatë në elitën e futbollit shqiptar.
Sulmuesi 23-vjeçar prodhim i akademisë së Partizanit, tani pjesë e Teutës, rrëfehet në një intervistë për Newsport.al pas fitores me Kukësin, ekip i cili nuk i besoi në pjesën e parë të sezonit.
Nga pengu i karrierës në titullin e Partizanit, te refuzimi i Dinamos në merkaton e janarit e deri në objektivat personale këtë sezon, sulmuesi shprehet në intervistën e mëposhtme.
14 pikë pas rifillimit të kampionatit, çfarë ka ndryshuar te Teuta?
-Ekipi duket që është më kompakt duke parë dhe afrimet që janë bërë në janar. Gjithashtu dhe tranjeri Martini po vë në dukje punën e tij me ekipin.
Ndaj Kukësit, një fitore revanshi për Dacin?
-Duke parë dhe pozitat që jemi, ndaj Kukësit morëm një 3 pikësh shumë të rëndësishëm. Nuk mund të them që ishte një fitore revanshi për mua, por një fitore e rëndësishme për ekipin.
E nisët sezonin me 2 gola në 2 ndeshje, më pas dëmtimet të penalizuan. Pse Kukësi nuk i besoi një kuksiani si Daci?
-Sezonin e nisa mjaft mirë por dëmtimet ndikuan për keq. Nuk mund të them qe kam pasur mbeshtjeten dhe besimin e duhur tek Kukesi. Gjithashtu jane ndërruar 3 tranjerë me stafe të ndryshme, dikush më besoi, dikush jo. Për moshën që kam, minutazhi jo i rregullt nuk është i dobishëm për mua si lojtar. Këto janë arsyet se pse zgjodha të largohem.
U përfol për një kalim te Dinamo por në fund zgjodhët Teutën.
-Zgjodha Teuten për shkak se e njoh ambientin dhe ekipin më mire. Gjithashtu kisha besimin qe është ekipi i duhur për mua në këto momente. Ndihem komod dhe i fokusuar për të dhënë maksimumin drejtë objektivave që kemi.
Me largimin e Hebajt, Teuta s’ka një bomber tipik. A është Daci zgjedhja e duhur?
-Me Hebajn kemi luajtur bashkë gjysmën e sezonit të kaluar, ku kemi bërë një punë të mirë të dy. Koha do e tregoje nëse është zgjedhja e duhur. Unë di vetëm që do të bëj maksimumin për sa kohë jam pjesë e Teutës.
Të shtunën ju pret Tirana në Air Albania, si e shihni përballjen me kryesuesit?
-Me Tiranën do të jetë një ndeshje e ndërlikuar pasi janë një ekip kompakt dhe me lojtarë cilësore. Ne do hyjmë për të marrë maksimumin në atë ndeshje dhe të tregojme forcën që kemi si ekip.
Jeni prodhim i akademisë së Partizanit me të cilët keni dalë edhe kampion. E mendoni një rikthim në kryeqytet?
-Në kohën që kam qenë pjesë e Partizanit kur dolëm kampion ka qenë një eksperiencë tepër e bukur por nuk pata fat që të kontribuoja për shkak dëmtimesh. E kam disi peng atë sezon. Rikthimi do ishte diçka e bukur por mendoj që çdo gjë ndodh vetë në momentin dhe kohën e duhur.
Cili është objektivi juaj këtë sezon?
-Objektivi im personal është të kaloj numrin e golave të shënuar sezonet e mëparshme në Superiore. Si ekip do punojmë për të arritur sa më lart në tabelë dhe të luftojmë për të fituar Kupën.
