Kreu i PD-së, Sali Berisha ka mbledhur sot drejtuesit politikë të qarqeve. Gjatë fjalës së tij, Berisha u ndal sërish tek përmbysja e bustit të Enver Hoxhës. Ai theksoi se regjimi i sotëm i ngjan atij të dekoratorit Hoxha.
Berisha tha më tej se jemi në fillim të revolucionit, por është një fillim i mbarë. Berisha tha se revolucioni paqësor duhet të vijojë jo vetëm me protesta paqësore, por edhe me mosbindje civile.
Ai shtoi se është e domosdoshme që të zhvillohen takime dhe debate në çdo organizatë të partisë, por edhe takime të hapura me qytetarët, që të jepen mesazhet e qarta për sfidat e reja që e presin opozitën.
“Nuk kanë përjetuar dhe nuk kanë asgjë në memorie për një revolucion paqësor. Të tjerë me të drejtë e dëgjojnë me skepticizëm këtë fjalë, por e vërteta është se në kushtet e këtij monizmi ka dhunuar Kushtetutën, shtetin ligjor pa një elektroshok të fuqishëm të këtij sistemi. Unë nuk di se si mund të ketë zgjidhje tjetër.
Ndaj dhe ne duhet të bëjmë një punë të jashtëzakonshme për të bindur shqiptarët për t’i tërhequr shqiptarët në këtë lëvizje. Mendoj se jemi në fillim e tij, por fillime shumë të mbara.
Mos harroni një gjë, nga viti 1991, këto janë protestat e para në historinë e Shqipërisë në të cilat forca politike, që organizon ato, ka vetëm një funksionar në shtet, një kryetar bashkie. Prandaj dhe kjo është një gjë jashtëzakonisht pozitive. Këto janë fillesat e një revolucioni.
Edi Rama gjatë viteve në bashki organizoi 753 protesta. Por nuk realizoi asnjë të vetme pasi iku nga bashkia. Pra, ishin protesta të qeveritarëve, të zyrtarëve. Jo të qytetarëve të revoltuar.
U ndala këtu për të theksuar se fillimi është shumë i mirë. Imagjinoni sakrificën e atyre njerëzve për të mbushur sheshin si kurrë më parë.
Imagjinoni sakrificën e atyre njerëzve që bëjnë për të mbushur sheshin si kurrë më parë. Por revolucioni paqësor, nuk është vetëm revolucion i protestave paqësore, por edhe i mosbindjes civile.
Kjo është element thelbësor e revolucionit paqësor. E ka thënë Gandi, është e shenjtë. Kemi një përqindje të lartë që e urren Ramën, kemi një përqindje tjetër që del në protestë. Pjesa tjetër kërkon të shohë shembuj te ne. Nëse nuk rrëzonim bustin, ta harrojë kush se fitonim zgjedhjet e marsit. Shtatorja mund të ishte edhe 10 vite të tjera aty ku ishte. Duhet t’i japim mesazhe shumë të qarta që sfida të tjera na presin përpara. Pa këro akte dhe sakrifica, ky regjim, siç ka vazhduar dhe do të vazhdojë, nuk realizohet ndryshimi.
Duhet të ndërmarrim një debat intensiv me qytetarët tanë. Duhet të krijojmë një situatë të përgjithshme proteste, revolte, reagimesh. Është e domosdoshme që kryetarë grupesh të organizojmë mbledhje me kryesitë e degëve, me aktivin e degëve, me seksionet dhe me qytetarët. Thashë edhe njëherë, kam mirëkuptim për të gjithë ata që e shohin me skepticizëm revolucionin dhe ata që ky term iu duket i largët. Ky regjim nuk ikën ndryshe, nëse ndonjë mendon se ky ikën me votë, personalisht nuk besoj diçka të tillë. Çdo ditë ky po e shton gjithmonë e më shumë mbështetjen kriminale. Protesta të tilla nuk i ka parë Shqipëria. Janë tjetër protestat me urbanë me të punësuar dhe tjetër protestat me qytetarë që janë të detyruar të marrin bukën me vete.”- tha Berisha.
