Pronari i agjencisë së udhëtimit “Buon Aventura”, Elidon Çela, i cili u arrestua tetorin e 2022 në portin e Durrësit pasi iu gjetën në autobusin që drejtonte rreth 500 mijë euro të padeklaruara, ka ngecur sërish në “rrjetën” e policisë kufitare, por këtë herë në portin e Vlorës.
Çela u lirua në dhjetor me detyrim paraqitje nga Gjykata e Apelit Durrës, por është shoqëruar nga policia në pikën kufitare të Vlorës, pasi po realizonte kontrabandë ilaçesh.
Përveç ilaçeve në autobusin e Çelës janë sekuestruar edhe shishe me shampanjë “Don Perinion” dhe pesticide në një operacion që u krye në bashkëpunim mes Doganës dhe policisë.
Kujtojmë se 32-vjeçari, administrator i kompanisë së transportit ndërkombëtar të udhëtarëve dhe drejtues i autobusit ku u gjetën 522 mijë euro të padeklaruara shpërtheu në Gjykatë pas arrestimit në tetor duke thënë: “Jam i gatshëm t’iu vë në dispozicion edhe faturat. Ka pushtetarë që ia vjedhin shtetit 4 milion euro dhe lëvizin të lirë, ndërsa unë në burg me paratë e mia“.
