“Ata erdhën në dyqanin tim me armë dhe më kërcënuan të mos shes pilula kontraceptive. Ata kontrollojnë të gjitha farmacitë në Kabul, ne e kemi të ndaluar shitjen e produkteve”.
Kështu u shpreh një farmacist afgan për mediat ndërkombëtare, për të treguar se talibanët kanë marrë një tjetër masë të fortë dhe njëherësh të çuditshme për të ndalur shitjen e kontraceptivëve në Afganistan.
Ata pretendojnë se përdorimi i tyre është një komplot perëndimor për të kontrolluar popullsinë myslimane.
Sipas Guardian, talebanët po shkojnë derë më derë, duke kërcënuar mamitë dhe duke urdhëruar farmacitë të pastrojnë raftet e tyre nga ilaçet dhe pajisjet e kontrollit të lindjes.
Ministria e Shëndetësisë publike e talibanëve në Kabul nuk ka lëshuar asnjë deklaratë zyrtare për këtë çështje, dhe përfaqësuesi i Fondit të Kombeve të Bashkuara për Popullsinë (UNFPA) në Afganistan nuk i është përgjigjur kërkesave për koment.
