Deputeti demokrat Dashnor Sula ka reaguar pas vendimit të BE për të rikthyer Shqipërinë në listën gri për qeverisjen fiskale. Sula shprehet në një postim në Facebook se kundërshtar të shpresës për tu futur në BE kemi qeverinë.
Ai shkruan se “Shqipëria ka qenë në këtë listë dhe kemi dalë në 2019, por në vend që të ecim përpara, bëjmë regres dhe rifutemi në listën e vendeve që dyshohen si parajsa fiskale ku bandat do të pastrojnë paratë”.
Ndër të tjera, Sula shkruan se ky është edhe një “’grusht’ i fortë ndaj qeverisë e cila insiston me ngulm për të miratuar amnistinë fiskale”, ndonëse BE e ka kundërshtuar.
Postimi i plotë:
Kur pret që të futesh në BE, por që qeveria të rifut në listën e shteteve që monitorohen nga BE për parajs fiskale.
Ne pak shqiptarët që kemi mbetur në Shqipëri qëndrojmë me shpresë që një ditë do të bëhemi pjesë e Bashkimit Evropian, por kundërshtar të shpresës tonë kemi qeverinë.
Për fatin tonë të keq, Vendet e Bashkimit Evropianë kanë rifutur Shqipërinë në listën e vendeve që janë nën monitorim për politikat fiskale. Kemi qenë në këtë listë dhe kemi dalë në 2019, por në vend që të ecim përpara dhe të arrijmë standartet e BE ne bëjmë regres dhe rifutemi në listën e vendeve që dyshohen si parajs fiskale dhe vende ku krijohen kushte për pastrim parash. Po të shikoni tabelën e mëposhtme që ka publikuar faqja zyrtare e Komisionit Evropian Shqipëria është e renditur e para në listën e vendeve që dyshohen për parajsa fiskale dhe që nuk bëjnë transparencë për politikat fiskale. Ndërsa të tjerat që vijnë më poshtë nuk janë aspak vende që ne aspirojmë.
Duket se ky është edhe një “grusht” i fortë ndaj qeverisë e cila insiston me ngulm për të miratuar amnistinë fiskale ndonëse kjo është kundërshtuar nga të gjitha vendet e BE.
Alarmin se Shqipëria është kthyer në një vend ideal për bandat për të pastruar paratë në shqipëri e ka dhënë më herët “Moneyval” që e futi Shqipërinë në listën gri për pastrimin e parave. Por pavarësish të gjitha këtyre duket se qeveria jonë nuk e “vendos ujin në zjarr”.
