Kryetari i Partisë Demokratike, Sali Berisha, pritet të mbledhë grupin parlamentar vetëm një orë para protestës që është lajmëruar se do të zhvillohet sot përballë Kuvendit.
Mësohet se mbledhja do të zhvillohet në selinë blu, ndërsa tema kryesore do të jetë protesta dhe Berisha me siguri do tu japë porositë e fundit deputetëve.
Opozita ka paralajmëruar një protestë për ditën e sotme, e cila do të mbahet përpara Kuvendit, ndërkohë që brenda në godinë do të zhvillohet seanca e radhës.
Protesta bashkë me seancën plenare do të nisin në orën 10.00 të mëngjesit, por ende nuk dihet sesa do të zgjasë. S’dihet nëse Rama do të marrë pjesë në seancën e sotme, por Berisha u ka bërë thirrje protestuesve që ta pengojnë të futet në Parlament.
