Nga Boldnews.al
Prej themelimit të saj, në vitin 2018 e deri në Tetor 2020, kompania e prodhimeve mjekësore “MSE” (ish-“Ashlar”), kishte arritur të siguronte vetëm një kontratë minimale, me vlerë 8 milionë lekë të vjetra, të lidhur me institucionet publike.
Por, kur kjo kompani iu shit disa personave, të cilët lidhen në mënyrë të drejtëpërdrejtë ose indirekt me bosin e Spitalit Amerikan, Klodjan Allajbeu, “MSE” siguroi dhjetra kontrata publike, me vlerë qindra milion lekë.
Dhe, thuajse të gjitha këto kontrata janë pa garë ose me “flamuj të kuq”, me anën e të cilëve ekspertët ndërkombëtarë ngrenë dyshime për procedura jo-transparente ose edhe korruptive.
Të dhënat e “openprocurement.al” tregojnë se shoqëria “MSE” ka siguruar 20 kontrata publike nga Tetori 2020 e deri në Shkurt 2023, me një vlerë totale prej 1.6 miliardë lekë të vjetra.
“Boldnews.al” ka arritur të identifikojë se të paktën 8 prej këtyre procedurave, nga ato me vlerë më të lartë, janë përfituar nga shoqëria private “MSE” nën dyshimet e “flamurit të kuq”.
Njerëzit e Allajbeut tek “MSE”
Kompania “MSE” rezulton të jetë krijuar në Gusht 2018 nga Denisa Bishyti. Sipas të dhënave të Thesarit të Shtetit, kompania nën drejtimin e Bishytit ka nënshkruar vetëm një kontratë publike, atë me Spitalin e Vlorës, për një pajisje “Videokolposkopi”, me vlerë 8 milionë lekë të vjetra.
Në Tetor 2020, Bishyti ia shet kompaninë Ilda Tërshanës, Arbër Liçaj dhe Can Kutay Orten.
Ilda Tërshana, e cila bleu 80 përqind të aksioneve të “MSE” rezulton se ka qenë për shumë vite drejtoreshë në kompaninë “Evita”, e lidhur me Klodjan Allajbeun dhe që zotëronte aksione në shoqërinë koncesionare për shërbimin e Hemodializës, “DiaVita”.
Ndërsa Arbën Liçaj, sipas raportimeve mediatike, ushtronte funksionet e inxhinjerit elektronik në Spitalin Amerikan të Klodjan Allajbeut.
Në shkurt 2023, Ilda Tërshana i shet aksionet e saj në kompaninë ‘MSE” tek Arbën Teqja. Edhe për këtë personazh, në media janë raportuar lidhje të tij me Klodjan Allajbeun.
Ata të dy ndajnë pasionin për kalërimin dhe janë pjesë e Shoqatës së Hipizmit, ndërkohë që Arbër Teqja rezulton edhe administrator në “Equos Resort”, i ndërtuar nga Allajbeu.
Tenderat me “flamuj të kuq”
Në Tetor 2020, Ministria e Shëndetësisë nën drejtimin e Ogerta Manastirliut, zhvillon procedurën për “blerje respirator për Reanimacionin”, me fond limit 625 milionë lekë të vjetra.
Në tender marrin pjesë 6 operatorë ekonomikë. Oferta e shoqërisë “MSE” ishte më e larta, me vlerë 572 milionë lekë të vjetra. Disa kompani të tjera paraqitën ofertë shumë më të ulta, afërsisht gjysmën e asaj që paraqiti “MSE”.
Por, në përfundim, Manastirliu eleminoi nga gara të gjithë konkurentët, duke ia dhënë tenderin shoqërisë “MSE”.
E njëjta frymë ka vijuar edhe në të paktën 7 procedura të tjera tenderuese, të cilat paraqiten në vjim, me rend kronologjik nga më i vonshmi, tek më i hershmi.
– Në Dhjetor të vitit 2022, Drejtoria e Shërbimit Spitalor të Librazhdit mbylli tenderin për “Bler Echo të përgjithshme”.
Në tender marrin pjesë 4 operatorë ekonomikë. Në përfundim, fitues shpallet “MSE” shpk, e cila kishte paraqitur ofertën më të lartë, në shumën 28 milionë lekë të vjetra.
– Në Prill 2022, shoqëria “MSE” shpallet fituese e një tenderi pa garë për “pajisje plotësuese për krevat gjinekologjik”, me vlerë 12 milionë lekë të vjetra, të zhvilluar nga Spitali i Lezhës.
Të dhënat zyrtare tregojnë që ‘MSE” ishte kompani e vetme në garë.
– Në Tetor 2021, “MSE” fiton një tjetër tender pa garë, për “blerje aparatura mjekësore”, me fond limit rreth 80 milionë lekë të vjetra, të zhvilluar nga Materniteti “Mbretëresha Geraldinë” në Tiranë.
Sipas dokumentave zyrtarë, në garë nuk ka pasur asnjë konkurent tjetër.
– Në Gusht 2021, Spitali i Vlorës zhvillon tenderin për “Blerje echo kardiake”.
Në garë marrin pjesë 4 konkurentë. Në fund, fitues shpallet ‘MSE”, me ofertën 28 milionë lekë të vjetra, e cila rezulton që nuk ishte më e ulta.
– Në Qershor 2021, shoqëria “MSE” shpallet fituese e tenderit “blerje pajisje hotelerie dhe mjekësore për Pediatrinë e Elbasanit, me ofertë 112 milionë lekë të vjetra.
Në tender rezulton se janë përfshirë 4 kompani dhe “MSE” ka paraqitur ofertën më të lartë.
– Në Mars 2021, “MSE” fiton një tjetër tender me “flamur të kuq”, të zhvilluar nga Spitali i Vlorës për “blerje aparat anestezie”, me vlerë 96 milionë lekë të vjetra.
Sipas dokumentave të procedurës, rezulton se “MSE” ka qenë konkurente e vetme në garë.
– Në Shkurt 2021, “MSE” merr pjesë në tenderin për furnizim-vendosje të pajisjeve hoteliere e mjekësore në Spitalin e Lezhës.
Në garë marrin pjesë 4 operatorë ekonomikë. Tre prej tyre nuk paraqisin ofertë dhe në fund shpallet fitues “MSE” shpk, me vlerë 325 milionë lekë të vjetra.
