Një javë pas tërmetit që gjunjëzoi Sirinë dhe Turqinë, numri i të vdekurve vazhdon të rritet. Të vdekurit e konfirmuar janë mbi 41 mijë, por nuk ka një vlerësim zyrtar se sa njerëz mund të jenë ende të pajetë nën rrënoja.
Megjithatë, mediat turke flasin për një shifër të përgjithshme që vërtitet në mbi 70,000 njerëz, përfshirë të rritur dhe fëmijë që mund të kenë ndërruar jetë.
Sakaq, presidenti turk Rexhep Tajip Erdogan tha se ekipet e shpëtimit kanë nxjerrë më shumë se 8,000 njerëz të gjallë nga rrënojat e ndërtesave të shembura.
Ndërkohë, koha për përpjekjet e ndihmës po mbaron. “Faza e rimëkëmbjes pas tërmetit po i afrohet fundit”, shpjegoi shefi i ndihmës i OKB-së Martin Griffiths nga Aleppo, në veri të Sirisë.
Gjatë ditës së djeshme, u shpëtuan të paktën 8 persona, edhe pse shpresat për të mbijetuar sa vijnë e po shuhen me kalimin e ditëve.
Ndërkohë, në Siri duket se operacioni i kërkim-shpëtimit është drejt fundit dhe se tashmë vëmendja do të përqëndrohet tek strehimi i banorëve të prekur.
Presidenti sirian Bashar al-Assad kishte rënë dakord që të lejonte më shumë ndihma të OKB-së të hynin në Siri.
Tërmeti prej 7.8 ballësh – që u pasua nga disa tërmete të tjera të fuqishme – në Turqi dhe Siri, është fatkeqësia e shtatë më vdekjeprurëse e këtij shekulli.
