Deputetja e Partisë së Lirisë, Monika Kryemadhi ka komentuar sërish sot kërkesën e paraqitur pranë kryetares së Kuvendit nga deputetet e Partisë Socialiste për të përjashtuar nga Kuvendi kryedemokratin Sali Berisha, pas deklaratës së tij për videot erotike të McGonigal me zyrtare shqiptare.
Sipas Kryemadhit koleget e saj socialiste po gënjejnë me kërkesë të kryeministrit Edi Rama, pasi deklaratat Berisha nuk i bëri në Parlament, por në selinë blu dhe si deputet ai nuk mund të mbajë përgjegjësi për ato që thotë jashtë foltores së Kuvendit.
“Tregojnë që janë gënjeshtare. Është shumë e rëndë për një grua të jetë gënjeshtare. Çdo ministre, deputete socialiste ka jetën e tyre private. Nuk janë as të parat as të fundit që mund të kenë historitë rozë. Ky është një justifikim, një provokim”, tha Kryemadhi për A2.
Ndërsa, e pyetur nëse opozita do të vijojë të organizojë protesta të tjera kombëtare, Kryemadhi pohoi se iniciativa të tilla mund të vijojnë pasi “McGonigal ishte vetëm indicia e gjithë procesit”.
Kujtojmë se pasditen e së hënës 27 deputetë socialistë kërkuan përjashtimin e kryetarit të Partisë Demokratike, Sali Berishës. Ishte deputetja Anila Dedaj, e cila bëri zyrtarisht kërkesën për përjashtimin e Berishës, pasi sipas tyre, ai përdori fjalë të rënda duke iu referuar ish-zyrtarit të FBI-së dhe zyrtareve shqiptare.
