Nga Boldnews.al
Gjykata e Tiranës ka shpallur të paligjshme veprimet e Policisë dhe Prokurorisë për arrestimin e 5 personave të shtunën e 3 Shkurtit 2023, si të dyshuar për përfshirje në veprimtari mashtruese me call-center.
Në mesin e javës së kaluar, gjyqtarja Migela Laska rrëzoi kërkesën e prokurores Mirela Zavalani, që kërkonte caktimin e masës së sigurimit “arrest me burg” për Gertin Qinami, Bajram Hoxha, Francesco Cecere, Aldo Margjoni dhe Saimir Lita.
Për prokurorinë, këta persona dyshohen për kryerjen e veprave penale të “Mashtrimit me pasoja të rënda” dhe “Pastrimi i produkteve të veprës penale”
Por, gjykata, pasi shqyrtoi provat e paraqitura nga Prokuroria, vlerësoi se arrestimi ishte i paligjshëm dhe caktoi për personat e dyshuar masën e “detyrimit për paraqitje”.
Të shtunën e 3 Shkurtit 2023, Policia e Tiranës njoftoi se kishte “goditur” një tjetër rast “Call Center” të cilët mashtronin të huajt në mënyrë që të investonin në bursa fiktive.
“Nga veprimet hetimore ka rezultuar se shtetasit e arrestuar ishin të punësuar në një subjekt call center dhe në bashkëpunim me shtetasit e shpallur në kërkim, telefononin shtetas të huaj, u prezantoheshin si agjentë shitjesh dhe përmes mashtrimit, i bindnin ata që të investonin në bursën fiktive Forex”, thuhej në njoftimin e Policisë.
Policia deklaroi për median se hetimi kishte nisur vetëm dy ditë para arrestimeve me iniciativë, pas kallëzimit të marrë nga një shtetas Italian, i cili pretendon se ishte mashtruar financiarisht.
Policia veproi me urgjencë, ndërkohë që nuk ishte asnjë ngut, pasi vepra penale dyshohet se ka ndodhur në vitin 2020. Policia nuk mblodhi asnjë provë, që do të konfirmonte dyshimet e saj ose pretendimet e kallëzuesit.
Megjithatë, veprimet e nxituara të Policisë u mbështetën nga Prokuroria e Tiranës, e cila iu drejtua gjykatës me kërkesën për vlerësimin e ligjshëm të arrestit dhe caktimin e masës “arrest me burg”.
Por përballë Gjykatës rezultoi se policia dhe prokuroria nuk kishin asnjë provë, duke konfirmuar kështu paligjshmërinë e veprimeve të tyre.
