Nga Boldnews.al
Një nga institucionet diskrete është Shërbimi Informativ i Ushtrisë, një shërbim i cili është totalisht nën kontroll të plotë të ministrit të Mbrojtjes por edhe të Kryeministrit. Koha e ka treguar se pajisjet përgjuese që disponon ky shërbim nuk përdoren ndaj “kundërshtarëve” në luftë, por përdoren për qëllime politike.
Dikur, SHIU ka përgjuar disa biseda të opozitës. Ndërkohë, koha ka evoluar dhe ministri aktual i Mbrojtjes po tenton që të fuqizojë këtë shërbim para “betejave” politike, të majit 2023 dhe të zgjedhjeve të përgjithshme pas 2 viteve.
Peleshi po krijon një strukturë paralele me Shërbimin Informativ Shtetëror, një shërbim i cili është dekonspiruar në maksimum kohët e fundit. Ndërhyrja kibernetike e iranianëve ka nxjerrë zbuluar bisedat e krerëve të SHIK-ut, madje agjentët, listën e tyre, telefonët, e-mailet etj. Dhe, në këtë situatë, Peleshi po tenton që të marrë në “dorë” këtë shërbim, duke blerë pajisje tepër të shtrenjta inteligjencës.
Sipas dokumenteve që disponon BoldNews.al, Ministria e Mbrojtjes hapi para pak kohësh një procedurë tenderuese. Tenderi u tentua që të bëhej me procedurën e kufizuar, e klasifikuar në nivelin “sekret”, prokurim në fushën e mbrojtjes dhe sigurisë.
“Ky tender është bërë bazuar në urdhrin me numër 48, i datës 16.6.2022, ndërsa ka si objekt ‘modernizimi i sistemeve në interes të rritjes së produkteve të inteligjencës’”, thuhet në këtë dokument. Fondi limit i kësaj procedure ishte 88.818.754 lekë pa TVSH.
Por jo gjithçka ka shkuar sipas planit të Peleshit! Disa javë pas hapjes së kësaj procedure, Ministria e Mbrojtjes ka shpallur një njoftim për anulimin e kësaj procedure, për shkak se “nuk është paraqitur asnjë ofertë brenda afateve kohore”.
Mësohet se pajisje të tilla kanë shërbimet izraelite, të cilat kanë pasur objekt edhe në vendin tonë. Duket se Peleshi por edhe Rama nuk kanë negociuar mjaftueshëm për të tilla pajisje, të cilat vijnë në Shqipëri herë pas here edhe në mënyra private.
Disa kohë më parë, disa shtetas janë ndaluar në Rinas me një pajisje përgjuese, ndërsa deri më tani çështja është konsideruar e mbyllur. Ka pasur dyshime se porositësit kanë qenë politikanë të rëndësishëm. Dhe, duke tentuar që të mos bien në të njëjtën grackë, Rama dhe Peleshi kësaj herë i bënë procedurat nga institucionet shtetërore.
Ndaj me të drejtë lindin disa pyetje dhe dyshime: Ku dhe kur do përdoren këto pajisje inteligjente? A do të përgjohen krerët e opozitës, nisur edhe nga skandalet e fundit që kanë nxjerrë zbuluar krerët e mazhorancës?
