Plani A apo Plani B. Kjo është dilema e madhe e Orges Shehit pak orë para sfidës me shkodranët. Tirana ka vazhduar edhe dje përgatitjet për sfidën me Vllazninë.
Problemi kryesor është nëse luajnë Lulaj dhe Hasani në formacionin e parë. Të dy kanë pasur shqetësime dhe rrezikojnë ndeshjen me shkodranët.
Kjo do të thotë se Shehi duhet të mendojë për zëvendësues dhe modul loje.
Me Lulajn jashtë prishet skema 3-5-2 dhe kalohet tek ekipi klasik. Behiratçe dhe Najdovski do të jenë në qendër të mbrojtjes, ndërsa Nikqi mund të jetë në sulm.
Alternativë është edhe Haxhiu për të qenë në fushën e lojës.
FORMACIONI – Me një llogari të thjeshtë, Bekaj është në portë. Në mbrojtje Toshevski, Najdvoski, Behiratçe dhe Përgjoni. Në mesfushë, Lushkja, Hila dhe Deliu. Në sulm Nikqi, Patrik dhe Haxhiu. Ky është opsioni i parë i Shehit.
Opsioni i dytë është me Hasanin dhe Lulajn në fushën e lojës. Në këtë rast do të ishte ndryshe. Nga ana tjetër, për çdo problem do të pritet deri pak orë para sfidës me Vllazninë në Shkodër. Plani B është që Shehi nëse rikuperon Lulajn dhe Hasanin atëherë do të luajë me tre mbrojtës dhe Patrik e Hasanin në sulm.
