Për deputetin Tritan Shehu, protesta e sotme pritet të jetë më e madhja që është zhvilluar ndonjëherë.
Në një prononcim për një televizion para protestës, Shehu tha se pjesëmarrja do jetë më e madhe se herët e tjera pasi “problemet, devijimet dhe ky skandali i fundit (çështja McGonigal) ka arritur kulmin e zullumit, ndaj dhe reagimi do jetë më i madh”.
Opozita proteston sot në orën 12:00 para kryeministrisë dhe ka paralajmëruar një pjesëmarrje masive. Njoftimi për protestë erdhi pas publikimit të dosjes së autoriteteve amerikane në ngarkim të ish-sheft të FBI-së në Nju Jork Charles Mcgonigal, që zbuloi dhe lidhjet e dyshimta me kryeministrin Edi Rama.
Në një mesazh para protestës, kryetari i PD-së Sali Berisha shkroi në rrjetet sociale: “Shqipëria po marshon drejt Tiranës! Tirana vërshon sot në rrugët dhe sheshet e saj! Rroftë Revolucioni Demokratik!”
