Për analistin Fatos Lubonja protesta e kësaj të shtune përpara Kryeministrisë ka sjellë risi por edhe kontradita në mënyrën sesi opozita po i zhvillon betejat e saj me kryeministrin Edi Rama.
Sipas Lubonjës kishte një ndjesi sot sikur njerëzit prisnin që të “digjej” Kryeministria, kjo e stimuluar edhe prej thirrjeve të kreut të PD, Sali Berisha atij të PL, Ilir Meta për ta shporrur dhe zhdukur Edi Ramën dhe qeverinë e tij.
“Ngulmoj tek teza që ka një lloj kontradiksioni mes retorikës së Berishës kryesisht, ku në një anë përdoret fjala revolucion, që do të thotë përmbysje me dhunë dhe mjeteve që po përdoren që janë protestat paqësore. Kontadiksioni është këtu, se revolucion nënkupton një shtet jo demokratik, që nuk funksionojnë elementët që lejojnë ndryshimin paqësor. Gjuha e fortë, fjalë të forta, fjalë që po t’i kthesh nga fjalë në gjëra materiale, duket sikur do eliminojmë fizikisht, do t’i zhdukim kundërshtarët. Nga ana tjetër këtyre fjalëve nuk i përgjigjet një situatë njerëzish. Duket sikur njerëzit prisin që kjo protesta do bënte një gjë të jashtëzakonshme, do digjet kryeministria apo nuk di”, tha Lubonja.
Por sipas tij, Berisha solli një risi me idenë e tij për të shënjuar katër institucionet e së keqes, siç ishin Kryeministria, Bashkia e Tiranës, selia e PS dhe Ministria e Brendshme.
“E reja aty ishte pikërisht ajo që bëri Berisha më pas, ku duket sikur shkoi dhe shënjoi ato institucione që janë më problematike dhe që duhen goditur nga ky revolucion, që duhet të japin dorëheqjen”, u shpre analisti.
Lubonja foli me tone kritikuese në emisionin “Kjo Javë” edhe për ndërkombëtarët në Tiranë, duke thënë se ka humbur roli i tyre si arbitër mes palëve pasi janë rreshtuar në krah të qeverisë, pavarësisht skandaleve të njëpasnjëshme.
“Tani ne kemi një problem që e ka shtuar Rama. Ka qenë një periudhë që këta ndërkombëtarët që shpesh i kemi marrë si arbitër, se protestat bëhen edhe për ata që të shikojnë se çfarë ndodh në vend, ndërhyrja e tyre ka rregulluar çështjet. Tani ndërkombëtarët për fat të keq kanë qenë në krah të qeverisë dhe ka humbur ai arbitri që mund të luante një rol pozitiv”, theksoi Lubonja.
Duke theksuar se është e pamundur që qeveria të rrëzohet me protesta, pasi mënyra demokratike e të marrurit besimin e popullit janë zgjedhjet, Lubonja shtoi se edhe tubimet janë të nevojshme.
“Unë them që protestat duhen, që të tregojnë se ka një pjesë të popullit që është kundër teje. E dyta, protesta është një presion për institucionet. E treta, ka shumë faktorë që bëjnë të mos mendohet se këtu mund të përmbyset me protesta. Këto protestat e fundit që kam parë, nga pjesëmarrja është e konsiderueshme, por nga ana tjetër, këta vijnë nga gjithë Shqipëria, janë një moment i aksionit të opozitës. Ndërsa, ai momenti që pritet dhe vështirë të vijë, është një moment kur derdhet Tirana më shumë, se ta mbush sheshin pa ardhur rrethet, por këta njerëz duket se kanë humbur ndjeshmërinë”, deklaroi ai.
