Kreu i Partisë Demokratike Sali Berisha, në fjalën e tij para protestuesve, tha se ky është një cunam popullor i revolucionit demokratik, për të cilin tha se do bëjnë çdo sakrificë që të triumfojë.
Berisha citoi edhe një shprehje të Xhorxh Oruell, i cili tjotë se është akt revolucionar të thuash të vërtetën në kohë gënjeshtre.
“Të nderuar të pranishëm në këtë cunam popullor të revolucionit demokratik.
Shqiptarë dhe shqiptare, kudo që jeni, që keni pritur me padurim këtë ditë, ditën e madhe të siparit të revolucionit demokratik, të përmbysjes së monizmit të dytë në Shqipëri.
Një përshëndetje vëllazërore kudo që ndodheni!
Miqtë e mi, do e nis fjalën time me një shprehje të të famshmit, Xhorxh Oruell, i cili shkruan se është akt revolucionar të thuash të vërtetën në kohë gënjeshtre.
Ndaj dhe sot, ditën e siparit të revolucionit tonë demokratik, për përmbysjen e monizmit dhe fitores së demokracisë, do themi të vërtetat tona.
Qëllimi më themelor i këtij revolucioni që nis sot është të mbrojmë të vërtetat, por edhe të bëjmë çdo sakrificë që ato të triumfojnë.”– tha Berisha.
