Nga Artan Fuga
Bisedë për tërmetet me Qenan K.
Unë : More, bien më shumë tërmete sesa më parë, apo e kam gabim?
Qenan K. : Sigurisht e ke gabim. Natyra në mijëra vjet as behet më e mirë dhe as bëhet më e keqe, njeriu është një mizë e vogël, një insekt, përpara saj. Na duket sikur bien më shumë tërmete, ka më shumë aksidente natyrore, sepse tani me mediat e sotme ne i marrim vesh të gjitha. Më parë, fshatari shqiptar merrte vesh çfarë ndodhte në fshatin e tij. Kaq! Prandaj flinte i qetë, dhe jetonte në paqe me botën. Kurse tani ne mediat na derdhin qysh në mëngjes të gjitha tmerret natyrore të botës, batica, zbatica, tërmete, zjarre nqë djegin pyje, terrene që rrëshqasin, cuname, etj. Prandaj njeriut i duket sikur ka ardhur apokalipsi. Në fakt natyra është po ajo, njeriu ndot qytetin e tij, se të ndoti natyrën, hahaha, është aq i vogël, sa mund të ndoti shtëpinë tënde një merimangë e vogël.
Ndotka natyrën njeriu!!! Cfarë narcistësh jeni!
Unë: Po mirë o Qenan K., si nuk është e vërtetë që vriten më shumë njerëz nga tërmetet nga më parë? Shiko tragjedinë që ndodhi në Turqi!
Qenan K.: Pa dyshim, tragjedi e madhe, e tmerrshme, por për këtë nuk e ka fajin natyra, nuk e kanë fajin ato shtresat e nëntokës që lëvizin, se ato kanë lëvizur gjithmonë. Por, njeriu që nuk respekton natyrën. Nuk është natyra që respekton njeriun, është njeriu që për të mirën e vet duhet të respektojë natyrën. Ndryshe ikën për dreq! Si një lëvozhgë që e merr dallga! Ja ndërton banesa me pesëdhjetë kate, ngjitur njëra me tjetrën, dhe pastaj, pasi bën këtë, qan se tërmeti e vrau, e shkatërroi, e dërmoi, e mbuloi. Tërmetet bëjnë shumë herë më tepër dëme se më parë sepse njeriu ka ndërtuar qytete, qendra urbane apokaliptike, pra bën vetëvrasje kolektive! Harakiri! Nuk vret tërmeti, vret njeriu njeriun, vret njeriu veten, njerëzimi vetëshkatërrohet.
Unë: Ik, mos ja fut kot, domethënë për tërmetet dhe shkatërrimet që ato sjellin fajin e paskan njerëzit?
Qenan K. : Dëgjo këtu, mos u bëj idiot dhe gjumash si disa! Ja, siç ka thënë Zhan Zhak Rusoi, tërmetet nuk vrasin lepujt, ujqit, breshkat, peshqit. Vrasin njerëzit, as kafshët e egra, as gjarpërinjtë. Sepse njeriu bën gabime! Kafshët nuk gabojnë kurrë! Kur them fajin e kanë njerëzit, nuk e kam fjalët për fëmijët e shkretë, ata janë të pafajshëm. Ata paguajnë fajet e të mëdhenjve. Por, edhe të mëdhenjtë nuk, kanë faj të gjithë. Nuk vret tërmeti, vrasin ata që pasi ndërtojnë shkel e shko, i bëjnë qytetet si ferr, duke ngritur çekiça me beton dhe hekur, u a varin mbi kokë njerëzve, që ngrysen, por nuk dinë nëse do të gdhihen. Këta vrasin, jo tërmeti. Ke vënë re ti që nga tërmetet vdesin vetëm të varfërit, të pasurit shumë rrallë. Ata jetojnë në vila, bunkerë, etj.
Unë: E po çfarë të bëjmë tani, vdiqëm vdiqëm, tërmetet nuk parashikohen!
Qenan K. : Nuk e dija që qenke kaq budalla, si ca hajvanë andej këndej që flasin pa kuptuar se çfarë thonë! Të mykur me dije të shekullit të njëzetë!
Si ore nuk u parashikokan tërmetet, je në vete ti? Varet se çfarë kupton me parashikim, o idiot! Nëse me parashikim kupton që të dish paraprakisht edhe orën, minutën që do të bjerë tërmet, nëse do të dish sesa vetë do vrasë, sa do shkatërrojë, sigurisht nuk parashikohet dot. O budalla, po kështu as se kur vjen autobuzi i Kamzës te Ushtari i Panjohur nuk e parashikon dot!!! Pse rrinë kot njerëzit në stacion? Ai niset, dihet se në parim do të vijë, pritet të vijë, sigurisht, por rrugës mund të vonohet, mund edhe të bëjë aksident, edhe të prishet fare dhe të mos vijë atë ditë. Por, kjo nuk do të thotë se nuk parashikohet ardhja. Përafërisht gjithmonë! Me gabime!
Ky është parashikimi!
Pse kot ka ngritur bota sisteme alarmi për tërmete dhe cuname!
Unë: Si mund të parashikohet?
Qenan K. : Ore, kjo është puna e sismologëve, nuk është që sismologu, gjithë ai derr burri i botës, flet në televizion sikur është prift, apo kryetar i bashkimeve profesionale. Del dhe thotë : Mos u bëni merak, tërmeti ra, tani nuk ka më rrezik se lëkundje të vogla do të jenë! Mos kini merak fare! Flet kot! Kopil i madh, hiqet si shkencëtar, por është thjesht një mashtrues. Thotë me vete: Po qe se bie tërmet dhe vdesim, askush nuk do të më kërkojë llogari, se të vdekurit janë të urtë. Po qese nuk bie, dal dhe them: Emooo e patë! Eshtë matematikë e pastër kjo! Dhe merr lekë, projekte, vuuuu xhepi plot! Ca i shpërndan ca i mban për vete!
Ka mikroteknologji që ndjejnë dridhjet e tokës, zhurmat, dhe paralajmërojnë për ardhje valësh sizmike me magnituda të ndryshme, ka matje të lëvizjes të nënshtresave të tokës edhe llogaritje të shpejtësisë mesatare të tyre, të drejtimit të lëvizjes, dihet pak a shumë ku po shkojnë të përplasen! Ndërtimet bëhen duke futur sensorë dixhitalë në betonet e mureve, etj. Tregon sa duron ndërtesa akoma! Lexoni librat me të reja e teknologjisë o idiotë!
Unë: Mos shaj o Qenan K., nuk ka lezet!
Qenan K. : E mo se nuk të gjen gjë nga fjala! Ti vetë më ke thënë se je shurdh nga ajo anë! Parashikimi për të ardhmen bëhet duke studjuar të kaluarën. Kur një zonë ka qenë sismike dhe ti shkon ndërton dhjetra pallate me nja dyqind kate atje, dihet që ti po ndërton shkatërrimin e tyre!
Cfarë të të them unë tani!
Edhe i ndërton, fut lekët në xhep, edhe e di që një ditë do të shëmben, dhe përsëri do të marrësh lekë nga riparimiet, ose do ta kesh sheshin e ndërtimit gati, për të ndërtuar përsëri, prapë do prishen dhe kështu për mijëra vjet!
Ja pse gjarpëri nuk ka frikën tërmetin, as sorra, as laraska, as qejfulli, as zhapiku, kurse njeriu vetvritet!
Vetëvriten qytete të tëra nga babëzia, pastaj kur tërmeti i godet qajnë si fëmija! Njeriu ndërton qytete antropofage, apokaliptike. Nuk ka faj natyra!
