Kaldajat në shkollën 9-vjeçare “Aleks Buda” në Cërrik, nuk funksionojnë.
“Kam një nip të vogël në klasë të parë edhe ata s’kanë ngrohje, me një fërnellë ngrohen atje, ngrohen 3 nga 3 veta. Nuk punon kaldaja,” – u shpreh një prind.
“Në shkollë kam nipat, çunat e gocës. Nuk kanë ngrohje, me ilaçe, me të gjitha, nuk janë kushtet tamam,” – tregoi një qytetar.
Fëmijët tregojnë se nga i ftohti detyrohen t’i mbajnë veshur xhupat, e dorashkat.
“Është klasa e ftohtë, por me rezistencë, s’ngroh shumë, vetëm po iu afrove,” – tha një nxënës.
“Një ngrohëse mbajmë për tu ngrohur, na ngroh por jo të gjithë klasën, i afrohemi që të ngrohemi,” – tha një tjetër.
Euronews Albania ju drejtua bashkisë së Cërrikut për këtë shqetësim, por zëdhënësi i institucionit tregoi se bëhet fjalë për një problem teknik.
Bashkia e Cërrikut nëpërmjet zëdhënësit të saj shpjegon se bëhet fjalë për një defekt teknik.
“Nga 23 shkolla në bashkinë Cërrik ditët e fundit kemi problematika për shkak të defekteve në kaldaja në dy shkolla “Aleks Buda” në Cërrik dhe “Adem Asllani” në Shrëpanjë. Defektet po riparohen nga shërbimet publike të bashkisë Cërrik dhe ndërkohë janë pajisur me ngrohëse elektrike për të përballuar situatën këto ditë. Brenda javës do të realizohet riparimi i tyre për të kaluar nga ngrohja lokale në ngrohje qendrore,” – deklaroi Mariglen Miraka.
Në këtë shkollë marrin dije më shumë se 300 nxënës.
