Akuzat kundër ish-shefit të kundërzbulimit të FBI-së në Nju Jork vijojnë të marrim vëmendjen e mediave amerikane, që ngrenë dyshime se çështja mund të jetë shumë e thellë se ajo që paraqitet në akt-akuzat e ngritura nga drejtësia.
“Labirinti McGonigal i FBI-së”, është titulli i një artikulli të publikuar këtë të Mërkurë nga “businessinsider” që bën një pasqyrim të jetës së Charles McGonigal që nga “fëmijëria e vështirtë” deri në kupolën e FBI-së.
Në artikull flitet edhe për marrëdhëniet e pazakonta me kryeministrin Edi Rama. “Në Shqipëri dhe gjetkë, McGonigal akuzohet se është përfshirë në shkëmbimin klasik të parave për favore, duke u mbështetur në marrëdhëniet e tij me zyrtarët amerikanë dhe kryeministrin shqiptar për të dhënë rezultatet që donin klientët e tij. Pjesa më e madhe e këtij aktiviteti lobues nën tryezë, thotë qeveria, ndodhi kur ai ishte ende në FBI”, shkruan “insider”.
“…Agron Neza kishte emigruar në Nju Xhersi nga Shqipëria, ku, sipas një aktakuze, ‘ai kishte qenë punonjës i një agjencie të inteligjencës shqiptare disa dekada më parë’. Një aktakuzë federale kundër McGonigal thotë se Neza i dha atij 225,000 dollarë në para cash, duke përfshirë një pagesë prej 80,000 dollarësh që përkoi me datën kur Guerriero (ish-e dashura e McGonigal) thotë se ajo pa çantën plot me para në apartamentin e McGonigal. Neza, i cili në aktakuzë është identifikuar vetëm si Personi A, nuk është akuzuar për ndonjë shkelje”, thuhet po ashtu në artikull, ku evidentohet një marrëdhënie miqësore e McGonigal me Agron Nezën:
“…Ai dilte me miqtë, ku porosiste biftekun e tij të përgatitur mirë. Kthehej netëve vonë dhe i thoshte Guerriero-s se kishte qenë me Agronin…”.
Në artikull ngrihen pikëpyetje nëse çështja McGonigal është shumë më e thellë se ajo që ish-shefi i kundërzbulimit të FBI-së akuzohet. Dyshimet ngrihen se Charles McGonigal mund të ketë punuar si një spiun i rusëve nën hundën e FBI-së, duke kompromentuar punën e agjencisë ligjzbatuese amerikane.
“…Por ta cilësosh McGonigal si një çështje lakmie dhe jo spiunazhi do të thotë të keqkuptosh se si funksionon ndikimi i huaj. Nuk duhet të jetë lakmi apo spiunazh. Mund të jenë të dyja”, shkruan Mattathias Schwartz.
