Një ngarkesë tejet e madhe prej 3.2 tonë kokainë është sekuestruar nga autoritetet në Zelandën e Re.
Ngarkesa e drogës me vlerë 316 milionë dollarë është sekuestruar nga marina e Zelandës së Re teksa lundronte në Oqeanin Paqësor dhe mësohet se ishte nisur nga kartelet në Amerikën e Jugut me destinacion final Australinë.
Mediat shkruajnë se kjo është sasia më e madhe e drogës e kapur ndonjëherë në vend.
Droga ishte ndarkuar në një anije dhe po lundronte qindra kilometra në veriperëndim të Zelandës së Re.
Nga çfarë shihet edhe në pamjet e operacionit, pakot me kokainë ishin të lidhura dhe mbi shumë prej tyre ishte vendosur logoja e superheroit të kinematografisë “Batman”.
Simboli në fjalë besohet se tregon se cilit kartel i përket droga, por ende nuk është zbuluar se kush e përdor Batmanin për t’u identifikuar.
“Kjo është gjetja më e madhe e drogave të paligjshme nga agjencitë e Zelandës së Re. Është më shumë sesa do të konsumonte Zelanda e Re në 30 vite”, tha komisioneri i policisë së Zelandës së Re, Andrew Coster.
Autoritetet nuk dhanë detaje të operacionit apo se si e zbuluan drogën, por shtuan se ishte një punë e bërë në grup me partnerët e tyre të inteligjencës “Five Eyes” – një grup që përfshin Australinë, Britaninë e Madhe, Kanadanë dhe SHBA-të.
