Opozita kërkon hetim penal për aplikacionin “Aktivisti”, denoncuar gjegjësisht si një formë përdorimi të administratës shtetërore nga PS, për interesa elektorale. Kryeministri Edi Rama, nga ana tjetër, ka kërcënuar me ndjekje penale publikuesit e listës së përdoruesve të këtij aplikacioni.
Kryetari i Partisë së Lirisë, Ilir Meta deklaroi në një konferencë për mediat këtë të Mërkurë se, “pas skandalit të patronazhistëve, skandali ‘Aktivisti’ është një tjetër dhunim flagrant i shtetit ligjor, por edhe një krim zgjedhor, që meriton të zbardhet plotësisht”.
“Mijëra punonjës të administratës publike, në shkelje të Kushtetutës e të ligjeve, si dhe në dhunim flagrant të lirive dhe të drejtave të tyre, janë detyruar nëpërmjet presioneve dhe shantazhit të bëhen pjesë e këtij aplikacioni që monitoron like-t, komentet dhe share në rrjetet sociale të postimeve të Edi Ramës dhe anëtarëve të tjerë të Qeverisë. Skandali bëhet edhe më i madh kur zbulohen se pjesë e listës së aplikacionit janë të paktën 40 prokurorë dhe 27 gjyqtarë, anëtarë të KLP, KLGJ, SPAK dhe të institucioneve të tjera kyçe të reformës në drejtësi, drejtues të lartë të Policisë së Shtetit në Tiranë dhe qarqe, mjekë, infermierë dhe mësues, punonjës të tatimeve, doganave etj”, theksoi Meta.
Kreu i PL-së konstatoi se ka shkelje ligjore në këtë çështje dhe kërkoi hetim nga drejtësia.
“Keqpërdorimi i punonjësve të administratës publike dhe institucioneve më të larta të drejtësisë në funksion të propagandës së gënjeshtërt të ‘Rilindjes’ dhe të zgjedhjeve vendore të 14 majit, nëpërmjet shantazhit, intimidimit dhe presionit, meriton një hetim të thellë dhe të gjithanshëm. I kërkojmë drejtësisë të zbardhin plotësisht të vërtetën, autorët dhe urdhëruesit e këtij skandali, që përbën jo vetëm veprimtari të ndaluar nga neni 91 i Kodit Zgjedhor, por përmban elemente të disa veprave penale të parashikuara nga Kodi Penal, duke filluar nga shpërdorimi i detyrës (neni 248 i Kodit Penal) i konsumuar nga funksionarët, deri te ‘Përdorimi i funksionit publik për veprimtari politike ose zgjedhore’, parashikuar nga neni 328/a, i Kodit Penal”, tha ai.
Edhe PD tha se çështja duhet të hetohet, por shprehu mosbesim te drejtësia.
“Kujt t’i bësh thirrje në këtë rast? Tradita e ka që t’i drejtohesh drejtësisë që të hapë një hetim. Por jemi në rastin kur problemi është me prokurorët dhe gjyqtarët janë ata që kanë shkelur ligjin dhe kodet etike duke e bërë veten subjekt të mundshëm të drejtësisë. Kush i heton ata që duhet të hetojnë. Kush e vendos drejtësinë, kur ata që duhet të vendosin drejtësinë janë promotorë të padrejtësisë”, u shpreh në një deklaratë për mediat zëdhënësja e Partisë Demokratike, Floriana Garo.
Kryeministri Edi Rama, nga ana tjetër, paralajmëroi padi për publikuesit e listës së përdoruesve të këtij aplikacioni.
Kreu i qeverisë flet për manipulim të listës së publikuar dhe pretendon se aplikacioni është mekanizëm komunikimi i brendshëm mbi bazën e vullnetarizmit të çdo përdoruesi.
“Partia Socialiste do të ndjekë në rrugë ligjore nxjerrjen, manipulimin dhe fabrikimin e të dhënave të rrjetit social të aktivistëve të saj, i cili është lehtësisht i verifikueshëm si një mekanizëm komunikimi i brendshëm mbi bazën e vullnetarizmit të çdo përdoruesi. Çdo përpjekje e dëshpëruar propagandistike për të hedhur edhe më shumë baltë mbi PS thjesht na rrit dëshirën dhe na forcon vullnetin tonë në rrugën e një fitoreje tjetër kuptimplotë, më 14 maj, kur falë edhe rrjetit tonë social të aktivistëve, Partia Socialiste do të jetë shumë hapa përpara kundërshtarëve të çoroditur e të dëshpëruar”, shkroi Rama në një postim në rrjetet sociale.
