Një tërmet i fuqishëm me magnitudë 7.8 që goditi herët të hënën në Turqi dhe Sirinë veriore, ka lënë pas vetes dhimbje, lot dhe më shumë se 3 mijë e 500 të vdekur.
Presidenti turk Recep Tayyip Erdogan ka shpallur 7 ditë zie kombëtare dhe tha në një konferencë për mediat se ky ishte tërmeti më shkatërrimtar që Turqia ka përjetuar në 84 vitet e fundit.
Tërmeti me epiqendër në Kahramanmaraş është ndjerë fuqishëm në provincat fqinje si Gaziantep, Adıyaman, Şanlıurfa, Malatya, Elazığ, Hatay, Mersin dhe Osmaniye.
Ai tha se nuk mund të parashikonte se sa do të rritej numri i viktimave dhe të plagosurve që deri më tani i ka kaluar 14 mijë e 500, ndërsa përpjekjet e kërkim-shpëtimit vazhdojnë, dhe se mbi 6000 ndërtesa janë shembur.
Ndërkohë në anën tjetër të kufirit, zyrtarët sirianë të shëndetësisë thanë se të paktën 538 vdekje u regjistruan në territorin e kontrolluar nga qeveria dhe 700 viktima janë konfirmuar në pjesët e kontrolluara nga opozita e kryengritësit.
Nga rrënojat janë nxjerrë 7 mijë e 840 qytetarë, ndërsa 338 mijë persona që janë prekur nga tërmeti janë vendosur në konvikte, universitete dhe qendra akomodimi në varësi të Ministrisë së Arsimit.
Në të dy anët e kufirit, banorët e zgjuar nga tërmeti para agimit dolën jashtë në një natë dimri të ftohtë, me shi dhe borë, ndërsa ndërtesat u rrafshuan përdhe.
“Ne shpresojmë ta kalojmë këtë fatkeqësi së bashku sa më shpejt të jetë e mundur dhe me dëme më të vogla”, shkroi presidenti turk Recep Tayyip Erdogan në Twitter.
Watch: A video shows the moment a building in #Turkey collapses after an #earthquake earlier hit several parts of the country killing at least 284 people.https://t.co/bENgkTTRaf pic.twitter.com/QY9LIg7Vpz
— Al Arabiya English (@AlArabiya_Eng) February 6, 2023
Qeveria e tij shpalli alarmin e shkallës së 4-të, që do të thotë se po kërkon ndihmë ndërkombëtare dhe i ka bërë thirrje NATO-s që të ndërhyjë, ndërsa në ndihmë i kanë ardhur edhe shtete që nuk pritej si Greqia dhe Rusia.
Mbrëmjen e sotme Erdogan pritet që të komunikojë nëpërmjet telefonit me Presidentin amerikan Joe Biden, ndërsa më herët gjatë ditës pati një telefonatë mes tij dhe Presidentin rus Vladimir Putin, me Moskën zyrtare që ofroi ndihmë për Ankaranë.
Sakaq, biseda me Biden është konfirmuar nga Shtëpia e Bardhë dhe vjen pasi SHBA-të u zotuan t’i japin Turqisë ndihmë.
Vendi ka premtuar të dërgojë dy ekipe kërkim-shpëtimi me 79 persona për të ndihmuar zyrtarët turq.
Është raportuar gjithashtu se do të vendoset një ekip për reagimin e ndihmës ndaj fatkeqësive.
Të hënën, sekretari amerikan i shtetit Antony Blinken foli me ministrin e Jashtëm turk Mevlut Çavusoglu.
Një zëdhënës i SHBA tha se vendi po kërkon burime shtesë financimi që janë në dispozicion për t’iu përgjigjur tërmetit në të dy anët e kufirit.
Sipas Shërbimit Gjeologjik të Shteteve të Bashkuara, dridhjet u ndjenë edhe në Liban, Egjipt dhe Qipro.
Turqia është në një nga zonat më aktive të tërmeteve në botë. Në vitin 1999, 17,000 njerëz humbën jetën kur një tërmet me magnitudë 7.4 – më i rëndi në dekada goditi në veriperëndim të vendit.
