Policia e Korçës ka arrestuar tre persona pasi në bashkëpunim me njëri-tjetrin shisnin lëndë narkotike të llojit kokainë dhe kanabis të ndarë në doza.
Niko Kapurani, 27-vjeç ka rënë në prangat e policisë bashkë me dy bashkëpunëtorët e tij Vangjush Shamija, 27-vjeç dhe Roland Aliun 46-vjeç. Gjithashtu në gjendje të lirë është proceduar një 22 vjeçar për moskallëzim krimi.
Është sekuestruar një sasi lënde të dyshuara narkotike kanabis dhe kokainë, të ndara në doza, gati për shitje.
“Në vijim të punës për parandalimin dhe goditjen e aktivitetit kriminal të shpërndarjes së drogave të forta, specialistët për Hetimin e Trafiqeve të Paligjshme dhe Narkotikëve të DVP Korçë, nën drejtimin e Prokurorisë pranë Gjykatës së Rrethit Gjyqësor Korçë, finalizuan operacionin antidrogë të koduar “Rrjeti”, si rezultat i të cilit u bë kapja dhe arrestimi në flagrancë i shtetasve:
R. A., 46 vjeç, N. K., 27 vjeç dhe V. Sh., 27 vjeç, banues në Korçë. Gjithashtu, u referuan materialet në Prokurori dhe filloi procedimi në gjendje të lirë për shtetasin A. K., 22 vjeç, banues në Korçë.
Shërbimet e Policisë, gjatë kontrollit fizik ndaj shtetasit R. A., në lagjen nr. 18, Korçë, i kanë gjetur atij një sasi të vogël lënde të dyshuar narkotike kanabis, të cilën dyshohet se ia kishte blerë shtetasit V. Sh., në lokalin e shtetasit N. K.
Në vijim të veprimeve, gjatë kontrollit të ushtruar në ambientet e këtij lokali, u gjetën sasi lënde të dyshuara narkotike kanabis dhe kokainë, të ndara në doza, të cilat u sekuestruan në cilësinë e provës materiale.
Gjithashtu, nga veprimet hetimore rezultoi se shtetasi A. K. ishte në dijeni të veprimtarisë kriminale që ushtrohej në këtë lokal, por nuk kishte kallëzuar krimin tek organet policore.”– njofton policia.
Vijojnë veprimet hetimore për dokumentimin e plotë të veprimtarisë kriminale të këtyre shtetasve.
Materialet i kaluan Prokurorisë pranë Gjykatës së Shkallës së Parë Korçë, për veprat penale “Prodhimi dhe shitja e narkotikëve”, kryer në bashkëpunim, “Përshtatja e lokalit për përdorim droge” dhe “Moskallëzimi i krimit”.
