Nga Boldnews.al
Një nga “ushtarët” më të bindur të ministres Balinda Balluku është padyshim Pirro Vengu, drejtor i Autoritetit Portual të Durrësit. Një drejtor që ka pasur “dorë të lirë” kohët e fundit, aq sa ka firmosur dhjetëra tendera të pavlerë për Portin e Durrësit, në një kohë që i gjithë trualli shtetëror iu dha pa asnjë qindarkë një firme arabe. Vengu ka vepruar me shpejtësi, të fitojë cc’të mundet nga ato që ngelen. Ndërkohë, në ditën që në qeveri u firmos marrëveshja me firmën “Alabbar”, Vengu firmos një tjetër tender, vetëm për konsulencë.
Por, nëse marrëveshja u firmos në qeveri, përse duhet një firmë private të bëjë konsulentin mes Portit të Durrësit dhe firmës private?!
A nuk u negociua këto kohë kjo kontratë? Apo konsulenca është bërë dhe Vengu vetëm sa po bën letrat e këtij tenderi? Natyrisht, koha e bërjes së këtij tenderi është shumë e dyshimtë, ccka ngre shumë pikëpyetje për gjithë këtë praktikë fiktive.
Sipas dokumenteve që disponon …, Autoriteti Portual i Durrësit ka hapur tenderin me objekt “konsulencë juridike dhe ekspertizë ligjore në kuadër të implementimit të projekteve ‘Durrës Yacht Marina’ dhe ‘Porti i Ri Tregtar në Porto Romano'”.
Pra, konsulencë për arabët dhe portin e ri. Po përse duhet një konsulencë e tillë kur të gjitha projektet i ka bërë qeveria? Nga se ka frikë Vengu, nga koncesionarët aktualë në Portin e Durrësit?
Kujtojmë se disa terminale në atë port janë dhënë me koncesion, ndërsa kontenierët janë dhënë me qira. Për këtë kontratë ‘Kurum’ ka bërë një padi në Gjykatën e Arbitrazhit, ndërkohë që padira të tilla mund të pasohen nga firmat e tjera private.
Por, duke u ndalur te tenderi i konsulencës, në dokumente sqarohet se fondi limit për këtë procedurë është 25.000.000 lekë ose rreth 250 mijë euro.
(Denoncimet e BoldNews.al për tenderët e Pirro Vengut)
Ditën e hënë, më datë 30 janar 2023, qeveria shqiptare firmosi marrëveshjen me arabët. Në marrëveshje parashikohet një PPP, ku shumicën e aksioneve e merr firma arabe. Por, në këtë mes është Autoriteti Portual i Durrësit, me në krye Pirro Vengun, i cili këto kohë është treguar “xhep shpuar”.
BoldNeës.al ka denoncuar në vijimësi tenderat e Vengut, ku i fundit ka qenë “sigurimi i pasurisë”. Fondi limit për këtë tender është 24.23.829 lekë. Më parë ka bërë tender me vlerë 110 mijë euro të për sinjalistikën e Portit të Durrësit. Madje guxoi dhe hapi tender me vlerë 1.3 milionë euro për zgjerimin e Portit, por dikush i “tërhoqi veshin” dhe ai u tërhoq.
Ka hapur dhe mbyllur edhe tenderin me vlerë 700 mijë euro për ta pastruar për tre vitet e ardhshme. Autoriteti ka bërë tender për mirëmbajtjen e rrjetit hidrik të Portit për 3 vjet, tender për sistemet e sigurisë për 3 vjet, tender për mirëmbajtjen e infrastrukturës IT për 3 vjet e kështu me radhë. Të gjitha këto tendera i kanë bërë duke qenë në dijeni të plotë se pas tre muajsh, në mos më shpejtë, Porti nuk do të ekzistojë më. Në muajt e fundit Vengu ka tenderuar mbi 10 milionë euro, madje edhe vinça nga 3 milionë euro, që pas disa muajsh do shiten për skrap.
