Dëshmia e pastrueses, Rozeta Dobi e cila u arrestua së bashku me të birin pas një vjedhjeje në shtëpinë e zyrtares së lartë të Kryeministrisë Alda Klosi ka ngjallur sërish dyshime në grupin e prokurorëve të çështjes.
Burime nga organi i akuzës bëjnë me dije se në dëshminë e mbrëmjes së djeshme që zgjati deri rreth orës 22:00 të mbrëmjes së djeshme është e paqartë se kush e ka bërë inskenimin e vjedhjes.
“Është e paqartë se kush e ka bërë inskenimin e vjedhjes, ndërsa tashmë do të bëhet dhe një ballafaqim mes Alda Klosit dhe pastrueses Rozeta Dobit”, thanë burimet.
Klosi ka mohuar që të jetë bashkëpunëtore. Policia ka dyshime për të dyja dëshmitë, edhe të Rozeta Dobit, edhe të Alda Klosit. Pasi dëshmia e Dobit mund të jetë për të shpëtuar të birin. Ndërsa dëshmia e Klosit, që nuk ka pasur bashkëpunim, për fshehjen e lekëve po merret me rezerva nga hetuesit.
Pastruesja Rezarta Dobi për më shumë se 7 orë ka rrëfyer para policëve dhe prokurorëve detaje nga ajo çfarë shihte në shtëpinë e punëdhënëses së saj Alda Klosit.
“Alda Klosi kishte 2-3 muaj e divorcuar nga burri dhe kishte probleme për t’i ruajtur lekët… M’i dha mua për t’i sistemuar nëpër shtëpi”, mësohet të jetë shprehur Rezarta Dobi në dëshminë e saj.
Pas kontrolleve të zhvilluara dhe zbulimit të shumave të mëdha prokuroria nisi hetimin edhe për të ardhurat e ish-zyrtares së Ahmetajt që ka mbajtur detyrën dhe në koordinimin për tre koncesionet e incineratorëve.
Alda Klosi duket se është verifikuar për akuzën e “Fshehjes së të ardhurave” dhe “Mosdeklarim të pasurisë” pranë Inspektoriatit të Lartë të Deklarimit të Pasurive në Tiranë.
