Kryetari i PD-së Sali Berisha prekur zhvillohet e fundit lidhur me çështjen e arrestimit të ish-zyrtares Alda Klosi.
Në një komunikim me ndjekësit në FB këtë të Shtunë, Berisha tha se paratë që i dha pastrueses Rozeta Dobi për të fshehur, Alda Klosi i vodhi bashkë me Arben Ahmetajn.
“Besoj se e morët vesh. Ajo që unë deklarova unë një ditë dhe që mediat qeshën me ironi, ajo provohet tani në gjykatë. Rozeta nuk ka vjedhë, Rozeta të gjitha strajcat me para përfshirë hapjen e kasafortës, e ka bërë me urdhër të Alda Klosit. Dhe unë këtë e deklarova para gazetarëve në rast se ju kujtohet. Gazetarët e përcollën me ironira, e përcollën me sarkazama: nxori dhe ky variantin e tij. Ishte shumë e thjeshtë. Po si mundet një grua, pa asnjë haber nga teknologjitë sekrete, të hapë një kasafortë? Po se hap dot kurrë! Kasafortën, del tani që Rozeta… kodin Rozetës ia dha Alda. E kuptoni apo jo?! Ajo zbatoi urdhrat, çoi të fshehë jo 120 mijë, por 700 mijë euro të vjedhura së bashku së bashku me atë që ai miku e quajti Tigrin e Korrupsionit, me Arben Ahmetaj, se ai ishte strumbullari, ai ishte i papërmbajtur në vjedhje”, tha Berisha.
Alda Klosi ka qenë ish-drejtoreshë e koncesioneve në ministrinë e Financave para disa vitesh dhe deri në korrik të 2022, shefe e kabinetit të ish zëvendës kryeministrit Arben Ahmetaj, për të kaluar më pas në Autoritetin e Mbikëqyrjes Financiare.
Pasditen e djeshme, ajo u arrestua pas një dëshmie të gjatë të pastrueses Rozeta Dobi, e cila dëshmoi se vjedhja në banesën e Klosit ishte e inskenuar. Sipas Rozetës, Alda i ka thënë që të marrë 120 mijë eurot nga kasaforta dhe t’i fshihte dhe të gjithën ta inskenonte si grabitje, pasi zyrtarja ka dashur që t’ia hidhte fajin bashkëshortin.
Dobi, me urdhër të prokurorisë së Tiranës, u arrestua për pastrim parash, dëshmi të rremë dhe fshehje të ardhurash.
