Nata e kaluar ka qenë një nga më të ftohtat e vitit, teksa temperaturat në Veri të vendit kanë zbritur deri në -7 gradë celcius dhe janë shoqëruar me reshje dëbore.
Reshje të lehta bore kanë rënë edhe në qytetin e Bulqizës, ndërsa ngrica ka pushtuar të gjitha rrugët nacionale dhe ato rurale të zonës duke vështirësuar qarkullimin e automjeteve në orët e para të mëngjesit.
Si pasojë e ngricave në rrugë, gjatë natës një aksident ka ndodhur në vendin e quajtur “Pishat në Fushë-Bulqizë”. Një automjet tip “Golf” doli nga rruga dhe u plagos rëndë drejtuesi, i cili u dërgua me urgjencë drejt spitalit të Traumës në Tiranë.
Sakaq, policia në Bulqizë i ka bërë thirrje drejtueseve të automjeteve të përdorin goma dimërore, si dhe drejtuesve të automjeteve që transportojnë minatorët të përdorin zinxhirë pasi në rrugët që të çojnë për në minierat e kromit ka prani edhe të dëborës.
Vështirësi në qarkullim për shkak të reshjeve të dëborës e ngricave ka edhe në by pass-in e rrugës së Arbërit.
