Kryetari i Partisë Demokratike, Sali Berisha u shpreh këtë të Premte se Charles McGonigal është përdorur nga Edi Rama për të ndikuar punën e Prokurorisë së Posaçme.
“Edhe këtu është përdorur McGonigal, duke kapur SKAP-istët ‘pse s’arrestoni filanin, çfarë prisni, çfarë bëni’. Po, Po, zbatonte porositë e Ramës, merrte paratë e Ramës”, u shpreh Berisha gjatë një takimi me drejtues të degëve të PD-së në Tiranë.
Berisha përsëriti edhe njëherë akuzën se Rama korruptoi një nga njerëzit më të rëndësishëm të FBI-së për të marrë peng opozitën. Më tej, kryedemokrati tha se Rama – të cilën e cilëson demon pushteti, “bëri gjithçka që pasi futi në xhep Lulzim Bashën, përdori Sorosin, FBI e të tjerë për të shpallur ‘non grata’ Sali Berishën”.
Berisha ngriti dyshime edhe për lidhje mes Ramës dhe oligarkut rus Deripaska, i cili është shpallur investitor strategjik nga qeveria e drejtuar prje tij.
“Askush nuk e di se McGonigali nuk ja solli Deripaska këtij, apo ky nuk ishte një lidhje ruse. Këto historia ne nuk merremi, se nuk i qartësojmë ne. Por ne shohim këtë, që me veprimin e tij nuk ngurroi për ti futur një thikë pas shpine partnerit strategjik”, tha ai.
Kreu i PD-së shprehu bindjen se do të zgjidhet ngërçi për regjistrimin në zgjedhjet lokale dhe PD do dalë fituese.
“Gjykata, Kuvendin e 11 dhjetorit, statutin e këtij kuvendi, procesverbalet dhe çdo gjë tjetër të këtij Kuvendi i ka gjetur në përputhje me ligjet e Shqipërisë. Kudo përveç se në korrupistanin e Edi Ramës, të nesërmen ky vendim regjistrohej në regjistër, sepse ai vendim gjykate ka vetëm një qëllim, regjistrimin e shoqatës apo partisë, në regjistrin e partive politike dhe shoqatave. Edi Rama me kancelarin e tij nuk lejon regjistrimin dhe mendon se në këtë mënyrë do të na përjashtojë. Në këtë mënyrë ai e çon vendin në një përballje të madhe. Ne kurrë nuk përjashtohemi, ne do të marrim pjesë në zgjedhje dhe do ti fitojmë zgjedhjet e këtë ai e ka shumë të qartë”, tha.
Berisha u zotua se aksioni në parlament i opozitës do të vijojë.
“Ne jemi njerëz të betejës dhe jo të bojkotit, jo. Unë edhe dje e theksova, aty në parlament, i them s’ke parë gjë akoma me rezistencën tonë. Nuk e lëshojmë ne parlamentin, parlamenti është i qytetarëve, nuk është i horrave, i banditëve, i kriminelëve, vrasësve, ndaj dhe ne nuk e lëshojmë. Ne do të qëndrojmë aty me një rezistencë më të fuqishme se kjo që shqiptarët kanë parë deri më sot”.
Gjatë fjalës së tij, Berisha kërkoi organizimin nga strukturat për protestën kombëtare, të thirrur të Shtunën e 11 Shkurtit.
