Seanca e sotme parlamentare i ka pasur të gjitha. Nga akuzat e forta e lëshuara mes mazhorancës dhe opozitës, te bllokimi i foltores e deri te përjashtimet, ku kryetarja e Kuvendit Lindita Nikolla i “mbylli derën” deputetit Gazment Bardhi.
Njëjtë si të enjten e shkuar opozita përdori çdo metodë për të treguar të vërtetat e skandalit të korruptimit të ish-zyrtarit të FBI-së, Charles McGonigal ku është përfshirë kryeministri Edi Rama, edhe pse ai iu fsheh llogaridhënies, duke deleguar Elisa Spiropalin që të përballej me deputetët e grupit Alibeaj në interpelancën e kërkuar prej tyre.
Në krahun tjetër përveç dy rasteve kur fjalën e mori kreu i Grupit të PS, Taulant Balla dhe ministrja Spiropali, PS ndoqi strategjinë e urdhëruar nga Rama dje në mbledhjen e tyre, ku do të votohet rendi i ditës dhe më pas të braktiset salla e Kuvendit.
Teksa interpelanca dështoi, deputetët e PD me këmbëngulje kërkuan praninë e Ramës në seancë dhe e shprehën revoltën e tyre në forma të ndryshme.
Gjatë kohës kur ministrat e Ramës prezantuar projektligjet që do të votoheshin, deputetët e opozitës nisën të krijonin zhurmë duke i rënë tavolinave të tyre me bidonë dhe pëllëmbë.
Ndërkohë që foltorja mbahej e bllokuar dhe oficerët e Gardës i kishin rrethuar, Gazmend Bardhi u afrua pranë ministrit të Mbrojtjes Niko Peleshi i cili kishte fjalën, duke i thënë diçka që më pas bëri që Lindita Nikolla ta përjashtonte.
“Për sot jeni përjashtuar, rrezikoni 10 ditëshin e përjashtimit zoti Bardhi”, tha Nikolla.
Po ashtu në pamje u shfaq dhe deputeti Lefter Gështenja, që kishte vendosur karrigen sipër tavolinës.
Ndërkaq, në seancën nuk munguan as fishkëllimat me bilbil në kulmin e tensionit. Ishin deputetët Saimir Korreshi dhe Bledjon Nallbati që u paralajmëruan nga Nikolla me përjashtim, pasi i kanë fryrë disa herë bilbilit në sallë.
Nikolla kërkoi nga të dy deputetët që të ndalonin, në të kundërtën do të përjashtoheshin siç ndodhi me Bardhin.
Sakaq, deputetja e Flutura Açka zgjodhi një tjetër formë proteste për mungesën e Ramës në interpelancë.
Teksa debati zhvillohej mes deputetëve, Açkangriti një letër të bardhë ku shkruhej mesazhin: “Dil nga vrima Rama”.
“Le të vijë dhe t’i thotë shqiptarëve është apo jo. Ai njeri duhet të vijë këtu të japë llogari. Jo të merret me patronazhime, dhe oreksin e kishte madh donte të patronazhonte edhe Amerikën. Kryeministri duhet të vijë të japë llogari, jo Elisa Spiropali”, u shpreh po ashtu deputetja demokrate.