Dy emigrantë shqiptarë janë burgosur në Britaninë e Madhe, pasi policia bastisi pranë Wakefield, një magazinë ku kultivohej kanabis me vlerë 1 milion paund.
Zef Gjoka dhe Dritan Mrozi, të dy 35 vjeç, u përpoqën t’ia mbathnin kur oficerët hynë në ndërtesën e ish-uzinës në rrugën Malvern më 14 nëntor të vitit të kaluar, por u ndaluan nga policia.
Sakaq një burrë i tretë që ndodhej së bashku me ta në magazinë arriti të largohej.
Policia gjeti fermën e cila ishte në një “shkallë industriale” me më shumë se 1,100 bimë kanabisi, që mund të prodhopnin deri në 100 kg kanabis.
Ndriçimi, ajrimi dhe një sistem vaditjeje me vlerë 30,000 £ ishte implementuar në këtë magazinë.
Gjithashtu kishte në të edhe dhoma banimi me shtretër dhe një kuzhinë.
Të dy të pandehurit, të cilët nuk kanë adresë fikse, pranuan akuzën e prodhimit të kanabisit. Ata u shfaqën në Gjykatën e Lartë përmes lidhjes me videolink nga HMP Leeds, ku mbahen në paraburgim.
Duke përfaqësuar Gjokën, Andrew Stranex tha se ai ishte dërguar në magazinë për të kontrolluar kanabisin.
Duke argumentuar se ai luajti një rol më të vogël në organizim, avokati shtoi: “Ai nuk kishte asnjë ndikim mbi askënd mbi të në zinxhirin e sipërmarrjes”.
Gjoka sakaq tha se e pranon fatin e tij dhe se pasi të lirohet, thjesht dëshiron të kthehet në vendlindjen e tij.
Ndërkohë për Mrozin, avokati tha se klienti i tij ishte trafikuar në Mbretërinë e Bashkuar, por kishte shpresa për t’u bërë një punëtor i ligjshëm ndërtimi. Megjithatë, ai nuk mundi të merrte lejen e punës dhe ra në kontakt me banda kriminale që merren me tregtinë e drogës.
Gjykatësi vendosi të dënojë Gjokën me tre vjet burg dhe Mrozin me dy vjet e gjysmë.
