Kryeministri Edi Rama këmbënguli në versionin se 225 mijë dollarët që Agron Neza i dha Charles McGonigal ishte një “borxh” dhe jo një ryshfet për të goditur opozitën.
“Në akt-akuzë flitet për një borxh të marrë dhe se do të kthehej mes të dyve”, deklaroi Rama në një lidhje me video me emisionin “Top Story”.
Megjithatë, interpretimi në këtë formë i akt-akuzës nga kreu i qeverisë, më shumë se bindës, duket një përpjekje për tu justifikuar. Në mënyrë kronologjike, në padi tregohet se pasi mori 225 mijë dollarët nga Agron Neza, McGonigal ishte protagonisti i inicimit një hetimi ndaj lobistit të PD-së në SHBA, Nick Muzin.
Dyshimet që ngrihen janë se paratë janë një formë ryshfeti për të goditur opozitën shqiptare për llogari të Ramës dhe jo një borxh, siç pretendon ky i fundit. Dyshimet janë përmendur gjegjësisht nga media amerikane në raportimet për rastin. Por, Edi Rama pretendoi ndryshe. “Media ndërkombëtare s’aludojnë implikojnë, akuzojnë, në asnjë formë qeverinë apo mua se s’kanë se si ta bëjë se aktakuza nuk e ka asgjë të tillë”, tha ai.
Rama mohoi edhe se ai ka qenë burimi i informacionit që iu dha McGonigal për Nick Muzin.
Sipas akt-padisë, më 25 nëntor 2017, McGonigal informon Prokurorin e Departamentit të Drejtësisë, me të cilin takoi politikanin-biznesmen në Austri, për një hetim të mundshëm kriminal për një shtetas amerikan (Muzin), që ishte regjistruar për të bërë lobizëm “për një parti që nuk ishte e kryeministrit Rama”. Po sipas akt-padisë, një ditë më herët, McGonigal kishte marrë informacion për këtë lobist nga Personi B – këshilltar i kryeministrit Edi Rama.
Por, Rama pretendoi se “s’kemi pasur informacion”.
Një tjetër deklaratë kontradiktore e kreut të qeverisë shqiptare krahasuar me atë se çfarë thuhet në dosjen amerikane, ishte ajo se në takimet mes tij dhe McGonigal nuk është folur për çështje biznesi.
“Unë flas për marrëdhënie që kam pasur unë në rastin konkret me ish zyrtarin e lartë të FBI dhe s’jam unë njeriu që duhet të pyetem nëse ka përfituar ai tjetri (Neza) në shtetin shqiptar nga çdokush. Di që me mua s’është folur për asnjë lloj biznesi nga ana e zyrtarit të lartë të FBI-së”, tha Rama.
Por, “letrat amerikane” thonë ndryshe. Sipas dokumentit të akuzës, gjatë një udhëtimi në Shqipëri në vitin 2017, “më 9 shtator i pandehuri McGonigal u takua me kryeministrin shqiptar [Edi Rama] dhe me Personin B [Dorian Duçka]. Me kërkesë të Personit A [Agron Neza] ai i bëri thirrje kryeministrit të kishte kujdes dhe të mos i jepte liçenca për kërkime nafte në Shqipëri një kompanie ruse guackë. Personat A dhe B kishin interesa financiarë nga vendimi i qeverisë shqiptare”.
Gjatë intervistës së mbrëmjes së sotme, Rama u rrek të sfumojë çështjen në fjalë, duke deklaruar se akt-akuza kryesore ndaj McGoigal është ajo për marrëdhëniet me oligarkun rus Deripaska dhe jo dosja për takimet me të.
“Çështja ka marrë shumë bujë, por jo për shkak të aspektit të hetimit që lidhet me Shqipërinë, po për hetimin kryesore që sipas akuzës lidhet me një implikim i ish zyrtarit të lartë me një oligark rus”, tha ai.
Rama u mundua të shfryjë edhe faktin e shpalljes investitor strategjik të oligarkut rus Deripaska nga qeveria shqiptare.
“Me oligarkun rus Shqipëria s’ka asnjë lidhje, unë jo e jo. Asnjë rast s’është folur për një personazh përveç së fundmi kur opozitat kur së bashku me altoparlantët e tyre të propagandës nxorën lidhje të kapjes së veshit mbrapsht me aktivitete në Shqipëri të kompanisë më të rrënjësishme të flamurit austriak, Strabak. Që mësova dhe unë që Deripaska paska pasur aksione dhe nga e cila është larguar menjëherë pasi është vendosur në sanksione. Është njësoj si të them që për shkak se Strabaku është në Shqipëri prej shumë vitesh ka marrë miliona euro punë nga qeveria e mëparshme, atëherë ata kanë qenë të lidhur me oligarkun në fjalë. Këtë s’mund ta them se është qesharake”, tha ai.
