Kryetari i PD-së, Sali Berisha paralajmëroi valë protestash, në një deklaratë nga selia blu këtë të Enjte.
Gjatë fjalës së tij në një takim me Kryetarët e Degëve të PD në të gjithë vendin në selinë blu, Berisha tha se do të ketë protesta të vazhdueshme para dhe pas asaj të 11 Shkurtit, e planifikuar të zhvillohet para kryeministrisë.
Berisha paralajmëroi dhe protestë edhe para Parlamentit.
“Ne kemi nisur betejën në parlament, kemi thirrur protestën në datën 11 shkurt dhe hymë në një fazë përfundimtare të largimit të Edi Ramës nga pushteti. Ne do të gërshetojmë dhe kombinojmë të gjitha format e përpjekjeve në këtë betejë. Revoltat në sheshe, rrugë, institucione dhe kudo. Qëndresa në parlament, hetimi parlamentar. Koha thërret popullin opozitar të gjendet në orën e tij. Ora më e rëndësishme në misionin tonë”, tha Berisha.
Kryetari i PD-së e vuri theksin edhe te rëndësia e një rezultati fitues në zgjedhjet e ardhshme lokale.
“Ndërkohë ne nuk shmangim, përkundrazi bashkërendojmë çdo përpjekje për 14 majin si një ditë fitoreje për kandidatët tanë të lirisë. Në pamje të parë është komplekse, por misioni kërkon të gjitha këto. Misioni kërkon që ne të bëjmë të gjitha përpjekjet për një sukses të vërtetë të PD-së me 14 maj, për largimin e Edi Ramës dhe rikthimin e votës së lirë shqiptarëve. Pra, detyrë jo e lehtë, por absolutisht e realizueshme. Jam i bindur se në këtë mision, PD do të fitojë, opozita shqiptare do të fitojë”, tha Berisha.
Duke u kthyer të protesta e 11 Shkurtit, ai tha se “koha është krejt tjetër, koha ka ndryshuar, në kuptimin që jo vetëm protesta e planifikuar që duhet të ketë përgjigjen më maksimale, me datën 11 shkurt duhet të mobilizohet çdo demokrat e demokrate”.
“Duhet të mobilizohet si asnjëherë më parë, për protestën në Tiranë. Tirana gjithashtu duhet të derdhet e tëra në shesh, Shqipëria duhet të vërshojë drejt Tiranës. Por ne jemi në revoltë, jemi në protestë, ky është revolucion”, shtoi.
Lexo edhe:
Berisha: PD në këmbë e tëra gjer në largimin e Ramës nga pushteti