Britania e Madhe do të përjetojë një “lockdown” të vërtetë ditën e sotme, teksa 500 mijë punëtorë nga të gjitha sektorët do të hyjnë në grevë, duke i zhytur shërbimet si shëndetësia, transporti publik dhe aeroportet në kolaps.
Mësuesit, nëpunësit civilë, shoferët e trenave, rojet e sigurisë, shoferët e autobusëve dhe stafet e aeroporteve do të jenë ndër grupet që do t’i bashkohen të mërkurës “DilJashtë”, në ditën më të madhe të grevave industriale prej më shumë se një dekade.
Miliona njerëz do të duhet të punojnë nga shtëpia me qytetet që duken si fantazmë me zyra thuajse bosh.
Rreth 85% shkollave do të mbyllen plotësisht ose pjesërisht dhe 15 firma hekurudhore nuk do të kenë asnjë tren në qarkullim. Miliona fëmijë pritet të humbasin mësimet pasi 23,000 shkolla janë goditur nga e para nga shtatë grevat e planifikuara, duke i lënë prindërit të shokuar.
Sekretarja e Arsimit, Gillian Keegan, tha sot në mëngjes për Times Radio: “Jam e zhgënjyer që ka ardhur deri këtu, që sindikatat kanë marrë këtë vendim. Kjo nuk është zgjidhja e fundit. Jemi ende në diskutime. Natyrisht që ka shumë aksione greve sot, por kjo grevë nuk kishte nevojë të vazhdonte“.
Sindikatat u kanë thënë anëtarëve të mos u thonë drejtuesve nëse planifikojnë të largohen, duke shkatërruar përpjekjet për të bërë plane emergjente.
Por zonja Keegan tha se ajo pret që shumica e shkollave të mbeten të hapura. “Ne shpresojmë që sa më shumë shkolla të qëndrojnë të hapura. Ne e dimë se drejtuesit e shkollave kanë punuar shumë për t’i mbajtur shkollat të hapura për sa më shumë fëmijë të jetë e mundur“, shtoi Sekretarja e Arsimit.
Bashkëdrejtuesi i Unionit të Arsimit Kombëtar Militant (NEU), Kevin Courtney mohoi se taktika ishte e papërshtatshme, duke thënë se qëllimi ishte që “goditja të ishte efektive“.
Ai pretendoi se 40,000 mësues të rinj i ishin bashkuar sindikatës më të madhe të arsimit në Mbretërinë e Bashkuar për të marrë pjesë në greva dhe paralajmëroi se veprimet industriale mund të intensifikohen nëse ministrat vazhdojnë të refuzojnë kërkesat e tyre për paga që përballojnë inflacionin.
Ministri i Arsimit Nick Gibb tha se ai priste që shumica e shkollave të hapeshin “në njëfarë kapaciteti“, por kritikoi sindikatat për shkaktimin e kësaj gjendje kolapsi.
“Grevat janë shkatërruese për arsimimin e fëmijëve, veçanërisht pas dy viteve të ndërprerjes gjatë pandemisë Covid. Dhe kjo është shkatërruese edhe për prindërit”, tha ai.
Sakaq, deputeti konservator Brendan Clarke-Smith, një ish-mësues, tha: “Ne nuk dolëm nga bllokimi për të parë sindikatat që përpiqeshin të na tërhiqnin përsëri në versionin e tyre të një “lockdoën-i”. Teksa ne po përpiqemi të rrisim ekonominë, e vetmja rritje që duket se gjenerojnë janë pagat e shefave të tyre”.
Themeluesi i Mumsnet, Justine Roberts tha se shumë prindër “do të detyrohen të punojnë nga shtëpia dhe të marrin leje vjetore ose pa pagesë për t’u kujdesur për fëmijët më të vegjël“.
Ndërkohë, udhëtarët e trenave do të bllokohen në shtëpi ndërsa drejtuesit e mjeteve do të dalin në rrugë edhe të premten.
Rreth 1,900 shoferë autobusësh në Londër do të nisin gjithashtu një grevë tre ditore. Radhë do të krijohen në aeroporte pasi stafi i kabinës së pasaportave do të largohet, por sipas planit të qeverisë pritet të zëvendësohen përkohësisht nga 600 ushtarakë.
Rreth 100,000 nëpunës civilë në 124 departamente qeveritare, përfshirë DVLA-në dhe Departamentin për Punë dhe Pensione, do të protestojnë gjithashtu.
Shtatëdhjetë mijë anëtarë të Unionit të “Universiteteve dhe Kolegjeve” në 150 zona do të jenë gjithashtu jashtë ambienteve të punës. Gjithashtu janë njoftuar nga Unioni greva të mëtejshme të ambulancave në Angli më 10 shkurt.
