Zyrtarët më të lartë ushtarakë të Gjermanisë dhe Mbretërisë së Bashkuar kanë paralajmëruar se Europa përballet me një rrezik në rritje nga Rusia dhe duhet të rrisë ndjeshëm përgatitjen ushtarake.
Shefi i Mbrojtjes së Gjermanisë, gjenerali Carsten Breuer, dhe Shefi i Shtabit të Mbrojtjes së Mbretërisë së Bashkuar, Marshalli Ajror Richard Knighton, theksuan se vendet europiane duhet të përballen me realitetin e ri të sigurisë dhe të marrin vendime të vështira për rritjen e shpenzimeve në mbrojtje.
Sipas tyre, forcimi i kapaciteteve ushtarake të Moskës dhe gatishmëria e saj për të zhvilluar luftë në kontinent, siç po ndodh në Ukrainë, përbëjnë një kërcënim serioz për sigurinë europiane.
Ata nënvizuan se gjatë dekadës së fundit, vendet anëtare të Bashkimi Evropian kanë dyfishuar shpenzimet për mbrojtjen, por kjo sipas tyre nuk mjafton përballë sfidave aktuale.
“Riarmatimi nuk është luftënxitës, por një veprim i përgjegjshëm për të mbrojtur qytetarët dhe për të ruajtur paqen”, cituan mediat deklaratën e tyre të përbashkët.
Paralajmërimi vjen në një moment kur tensionet mes Perëndimit dhe Rusisë mbeten të larta, ndërsa lufta në Ukrainë vazhdon të ndikojë drejtpërdrejt në arkitekturën e sigurisë në Europë.
