Kryetari i Partisë Demokratike, Sali Berisha deklaroi në mbledhjen e Kryesisë se “McGonigal” dhe ortaku i tij, Mark Rossini, të dy ish-shefa të FBI, u angazhuan haptazi në një veprimtari kriminale dhe anti-kushtetuese, për llogari të Edi Ramës.
Qëllimi i tyre, tha Berisha, ka qenë asgjësimi i opozitës shqiptare.
Lideri i opozitës kujtoi edhe akuzat e Mark Rossinit në vitin 2019, të cilit i jepej edhe hapësirë mediatike në televizionet e kontrolluara nga Edi Rama.
Berisha: “McGonigal është në një hetim të gjithanshëm në SHBA. U përket autoriteteve amerikane të qartësojnë gjer më një lidhjet e tij, agjenturore apo korruptive me Shestakovin, Fokin, del sot në skenë një tjetër, me Deripaskën dhe të tjerë. Por një gjë është e sigurtë, lidhjet e tij me Edi Ramën janë më të turpshmet në historinë e këtij vendi.
Ti lejojë vetes Shqipëria të korruptojë një qenie të dobët, që nuk duhej të ishte kurrë aty ku ishte ai dhe të mos njoftonte që në rastin e parë, partnerin dhe aleatin tonë strategjik, është bashkëpunim në një krim të shëmtuar kundër SHBA, Shqipërisë, NATO-s dhe kundër çdo vendi të lirë.
McGonigal dhe Mark Rossini, bashkëpunëtor dhe ortak i tij, janë angazhuar haptas në veprimtari kriminale, antikushtetuese, antishqiptare për llogari të Edi Ramës. Qëllimi i tyre ka qenë asgjësimi i opozitës shqiptare.
Nga viti 2014 rezulton se Mark Rossini, një person që unë kurrë nuk e kisha dëgjuar, bënte akuza ndaj meje si kukull e Putin dhe i përsëriste këto në vitin 2019 në televizionin e Ben Blushit dhe Edi Ramës. McGonigal nuk është dorëjashtë në çdo gjë që ka ndodhur për asgjësimin e opozitës shqiptare“, tha kreu i PD.
